Жасур Яхшибоев Польша чемпиони сафига ўтади

Польшанинг амалдаги чемпиони «Легия» сафида ўзбекистонлик футболчи пайдо бўлиши мумкин.

Варшаваликлар матбуот хизмати клуб расмий Twitter саҳифасига трансфер ҳештеги остида Ўзбекистон харитаси суратини жойлаштирди.

https://twitter.com/LegiaWarszawa/status/1359879875725651973

Аввалроқ «Championat.asia» Польшанинг амалдаги чемпиони «Шахтёр Солигорск» ҳужумчиси Жасур Яхшибоевга қизиқиш билдираётгани ҳақида хабар қилганди.

Маълумот учун, Яхшибоев 2020 йилги мавсумни Беларуснинг «Энергетик-БГУ» жамоасида бошлади. Минскликлар сафидаги бир даврада 14 ўйин ўтказиб, 9 гол ва учта голли узатма амалга оширган Жасур ёзда «Шахтёр» сафига бориб қўшилди. Мавсум якунида Яхшибоев солигорскликлар сафида Беларусь чемпионига айланди.

«Легия» Польша чемпионатининг 2020/21 йилги мавсумида 16-турдан кейин 32 очко тўплаган ҳолда иккинчи ўринда бормоқда.

Жамоа Чемпионлар Лигаси 2020/21 йилги мавсуми саралаш босқичида «Омония»га ютқазиб, мусобақани тарк этган. Шунингдек, Варшава клуби Европа Лигаси гуруҳ босқичига йўлланма берувчи плей-офф ўйинида «Қорабоғ»га мағлуб бўлиб, Еврокубокларсиз қолганди.