Британиялик олимлар икки йўналишда мутацияга учраган SARS-CoV-2 коронавирусини юқтириш бўйича 76 та ҳолатни қайд этди. Янги мутациялар Бристоль ва Ливерпулда аниқланган, деб ёзмоқда «РБК».
SARS-CoV-2’нинг Бристолда аниқланган тури мутахассисларни ташвишга солмоқда. Янги ва ривожланаётган респиратор вируслари хавфи бўйича маслаҳат гуруҳи мутахассислари мазкур штамм нафақат юқумлироқ бўлиши, балки вакцина билан ўзаро реакцияга киришиб, унга қарши туриши мумкин, деб ҳисобламоқда.
Таъкидланишича, ҳозирча бу фақат хавотир. Тадқиқотчиларнинг фикрига кўра, вакцина олган одамлар ушбу штаммларнинг оғир таъсиридан ҳимоя қилинади. Соғлиқни сақлаш мутасаддилари, шунингдек, вакцинанинг ушбу штаммларга қарши самарали бўлишига катта ишонч билдирди.
Хабарга кўра, ҳозирда дунё олимларини хавотирга солаётган тўртта коронавирус тури мавжуд: иккитаси «британча», бири Жанубий Африкада ва биттаси Бразилияда пайдо бўлган штаммлар.
Январь ойида Огайо штати университети олимлари COVID-19 инфекциясини келтириб чиқарадиган SARS-CoV-2 вирусининг иккита янги турини кашф этгани ҳақида хабар берганди. Улар иккала вариант ҳам АҚШда пайдо бўлган бўлиши мумкин, деб тахмин қилган. Тадқиқотчилар фикрича, ушбу турлар ҳам SARS-CoV-2’нинг аввалги вариантларига қараганда юқумлироқ бўлган «британча» штамм каби тезроқ тарқалади. Аммо олимлар янги штаммлар вакцина самарадорлигига таъсир қилмайди деб ҳисобламоқда.
Аввалроқ Британияга «қора рўйхат»даги мамлакатлардан ташриф буюрувчилар учун «COVID-меҳмонхоналар» ташкил этилиши ҳақида хабар берилганди. Мамлакатда 15 февралдан бошлаб COVID-19 хавфи юқори бўлган давлатлардан ташриф буюрувчилар учун икки ҳафталик мажбурий карантин жорий этилади.
Изоҳ (0)