«Гарри Поттер» франшизасининг тез орада сериал кўринишидаги давоми ҳам пайдо бўлади. HBO Max стриминг сервиси ҳозирда бу борадаги ишга жалб этиладиган бир нечта сценарийнавислар билан музокара олиб бормоқда, деб ёзади «Bazaar.ru».
Канал раҳбарияти айни вақтда барчага севимли бўлган тарихни телевидение тилига қандай қилиб «ўгириш» ва уни телевизион экранга мослаштириш масалаларини муҳокама қилмоқда. Платформа вакилларининг таъкидлашича, «Гарри Поттер» сериали ҳозирча ишлаб чиқариш жараёнида эмас. Афтидан, барча ишлар ҳали дастлабки босқичда.
«Гарри Поттер» — Warner Bros. студиясининг энг қадрли франшизаси ҳисобланади. Жоан Роулинг қаламига мансуб 7 та китоб асосида суратга олинган фильмлар бутун дунё прокатида 7 миллиард доллардан ортиқ маблағ тўплаган.
«Шунингдек, студия портфолиосида ‘Гарри Поттер’ оламида содир бўлган ва унинг приквели ҳисобланган ‘Фантастик махлуқлар’ серияси ҳам мавжуд. Унда ҳозирга қадар 2 та фильм чиққан ва учинчи қисмга тайёргарлик кўрилмоқда, шундан сўнг яна иккита якуний қисмларни суратга олиш режалаштирилган», — дейилади хабарда.
Аввалроқ Японияда «Гарри Поттер»нинг сеҳрли оламига бағишланган боғ барпо этилгани тўғрисида хабар берилганди.
Изоҳ (0)