Нидерландия бош вазири комендантлик соати жорий этилиши фонида уюштирилган тартибсизликларни қоралади

Нидерландия бош вазири Марк Рютте мамлакатда ўтган ҳафта охири юз берган тартибсизликларни қоралади, деб ёзади «Интерфакс» The Guardian’га таяниб.

«Бунинг қонуний норозиликларга ҳеч қандай алоқаси йўқ. Бу жиноий зўравонлик», — деган Рютте. Унинг таъкидлашича, тартибсизликлар тунги комендант соати зарурлигини кўрсатмоқда.

Эслатиб ўтамиз, 23 январдан Нидерландияда бутун мамлакат бўйлаб 21:00 дан 04:30 гача амал қиладиган комендантлик соати кучга кирди, у 10 февралгача давом этиши белгиланганди. Мамлакатнинг бир қатор шаҳарларида, хусусан, Амстердам ва Эйндховен шаҳарларида  коронавирус пандемияси туфайли чекловларга қарши норозилик намойишлари бўлиб ўтди.

Нидерландия полицияси ушбу шаҳарлардаги намойишчиларни тарқатиш учун махсус воситалардан фойдаланди.

Полиция сув замбараклари, дубинкаларни қўллади, Эйндховенда эса кўзни ёшлантирувчи газдан ҳам фойдаланишди. Иккала шаҳардаги намойишчилар ўз навбатида ҳуқуқ-тартибот органлари ходимларига феерверклар ёғдирди, Эйндховенда эса одамлар куч вакиллари йўлини велосипедлардан иборат баррикадалар билан тўсишга уринди.

Амстердамда, полиция маълумотларига кўра, 1,5 минг киши митингга чиқди, уларнинг 100 дан ортиғи ҳибсга олинди.