Пекин COVID-19 билан боғлиқ вазият ёмонлашгани сабабли вирусга қарши чораларни кучайтирди

Хитой пойтахти расмийлари Пекинда еттита янги касалланиш ҳолати аниқланганидан сўнг коронавирус тарқалишининг олдини олиш чораларини кўриб чиқмоқда. Бу ҳақда маҳаллий нашрларга таяниб «Интерфакс» хабар бермоқда.

Хусусан, 2020 йилнинг 10 декабридан бошлаб шаҳарга кириб келганларнинг барчасида инфекция бор-йўқлигини текширишга қарор қилинган, чунки вирусни айнан ташқаридан олиб кириш янги касалланиш ҳолатлари ошишига олиб келган бўлиши мумкин.

Пойтахт маъмурияти қарорига кўра, сўнгги суткада 6 та янги касалланиш ҳолати аниқланган Дасин тумани яқинида жойлашган «Тянгун юань» метро бекати ёпилди.

Сўнгги суткада 46 та янги «ички» касалланиш ҳолати қайд этилган Шимоли-шарқий Хитойдаги Цзилин провинциясидаги вазият ёмонлашишда давом этмоқда. Бир кун аввал 43 та, 17 январь куни эса 30 та ҳолат аниқланган. Шу билан бирга, яқинда инфекция тарқалишининг янги эпицентри бўлган Хебей провинциясида 19 январь куни мамлакатнинг ўзида касалланган 19 киши аниқланган. Бу сўнгги кунларга қараганда анча кам.

Хитой Соғлиқни сақлаш давлат қўмитасининг 20 январь куни эълон қилган маълумотларига кўра, ўтган сутка давомида мамлакатда 103 киши COVID-19’га чалингани аниқланган. Улардан 15 нафари чет элдан вирус юқтирган, қолган 88 таси мамлакатнинг ўзида касалланган.

Мамлакатнинг ўзида касалланиш ҳолатлари бўйича Пекин, Цизин ва Хебей провинцияларидан ташқари Россия билан чегарадош Хейлунцзянь провинциясида ҳам 16 та янги касалланиш ҳолати қайд этилган.

Инфекция тарқалишининг қайта авж олиши 12 февралга тўғри келаётган «Баҳор байрами» — Ой календари бўйича Янги йил арафасида юз бераётгани Хитой ҳукуматини хавотирга солмоқда. Ушбу байрам Хитойда энг обрўли байрамлардан бири ҳисобланади. Анъанага кўра, бутун мамлакат бўйлаб «катта» оиланинг барча аъзолари бир жойга йиғилади. Бу аҳолининг оммавий миграциясига, у эса ўз навбатида одамларнинг оммавий йиғилишига олиб келади. Бу вирус тарқалишининг кучайишига сабаб бўлиши мумкин.

Аввалроқ Хитойда 8 ой ичида биринчи бор коронавирусга чалинган бемор вафот этгани, мамлакатдаги 5 миллион аҳоли яшайдиган шаҳар бир кишида коронавирус аниқлангани сабаб изоляцияга олингани ҳамда Хитойнинг Нангонг шаҳрида беш кун ичида 1,5 минг хонали COVID касалхонасини қурилгани ҳақида хабар берилганди.