Наманганда 21 яшар она ва унинг икки ўғлига туғилганлик ҳақида гувоҳномалар топширилди. Бу ҳақда «Дарё»га ДХА вилоят бошқармаси матбуот хизмати маълум қилди.
Мингбулоқлик Мадина Бекбоева шу пайтгача туғилганлик ҳақида гувоҳномасиз яшаб келаётган эди. Чунки туғруқхонада фамилияси ўзгартириб ёзилгани боис вақтида гувоҳнома ололмаган.
Эсини танибоқ шахсини тасдиқловчи ҳужжат олиш ҳаракати билан кўплаб идоралар эшигини тақиллатган. Бироқ фамилияга аниқлик киритиш учун судга мурожаат қилганда харажатларни тўлаш учун шароити бўлмаган.
Мадинанинг таъкидлашича, унда на мактабни тамомлаганлик тўғрисида шаҳодатнома, на фуқаролик паспорти бор. Чунки туғилганлик ҳақида гувоҳномаси йўқлиги учун ҳеч бирини олиш имкони бўлмаган. У ҳужжати йўқлиги туфайли ҳатто ишга ҳам кира олмаган.
Унинг мурожаати Давлат хизматлари агентлиги Наманган вилоят бошқармаси томонидан ўрганиб чиқилиб, ҳуқуқий ва амалий кўмак берилди. Мадинанинг туғилганлик гувоҳномаси фуқаролик суди қарори орқали қонуний ҳал этилди.
Мадина шаръий никоҳдан ўтиб, оила қурган ва икки фарзандни дунёга келтирган. Уларга ҳам туғилганлик гувоҳномасини олишда қийинчиликка учраган аёл шахсини тасдиқловчи ҳужжатга эга бўлганидан сўнг икки фарзанди —Муроджон ва Нурсултонга ҳам туғилганлик ҳақида гувоҳномалар расмийлаштирди.
Изоҳ (0)