Миллий ғоя тарғиботи, маънавий-маърифий ишлар самарадорлигини ошириш, жамиятда адабиёт ва китобхонликни яна-да ривожлантириш мақсадида «Ижод» жамоат фонди негизида Маънавият ва ижодни қўллаб-қувватлаш фонди ташкил этилади. Бу ҳақда 19 январь куни Президент Шавкат Мирзиёев раислигида ўтказилган видеоселектор йиғилишида маълум қилинди, дея хабар бермоқда «Дарё» мухбири Миролим Исажонов.
«Мазкур жамғармага 120 миллиард сўм ажратилиб, ушбу маблағлар маънавий-маърифий тарбия ва тарғибот-ташвиқот ишларини самарали амалга ошириш, миллий адабиётимизни ривожлантириш учун сарфланади.
Бу маблағнинг 90 миллиард сўми ҳудудларда маънавий-маърифий соҳаларни ривожлантиришга, 20 миллиард сўми Ёзувчилар уюшмаси фаолиятини қўллаб-қувватлашга, 10 миллиард сўми эса республика миқёсида маънавий-маърифий ишларни самарали ташкил қилишга йўналтирилади. Ушбу маблағларни тақсимлашда ҳудудлардаги аҳоли сони ва уларнинг ўзига хос хусусиятларини инобатга олиш лозим», – деди давлат раҳбари.
Аввалроқ Шавкат Мирзиёев савиясиз кўрсатувларни танқид қилган маҳалла фаолининг таклифига муносабат билдирганди.
Изоҳ (0)