Ўзбекистон қишлоқ хўжалиги вазирининг икки нафар ўринбосари лавозимидан озод этилди, дея хабар қилмоқда вазирлик матбуот хизматига таяниб «Gazeta.uz».
Қишлоқ хўжалиги вазирининг озиқ-овқат саноатини ривожлантириш бўйича ўринбосари Саидкамол Хўжаев бошқа ишга ўтгани муносабати билан лавозимидан озод қилинган.
Маълум қилинишича, Саидкамол Хўжаев 2018 йилнинг июлида қишлоқ хўжалиги вазирининг молия ишлари бўйича ўринбосари лавозимига тайинланган. 2020 йилнинг сентябрь ойида эса вазирнинг озиқ-овқат саноатини ривожлантириш бўйича ўринбосари этиб тайинланган. Олдинроқ у «Агробанк» раҳбари лавозимида ишлаган.
Бундан ташқари, қишлоқ хўжалиги вазирининг фан, таълим ва ишлаб чиқариш интеграциясини таъминлаш бўйича ўринбосари Ботиржон Сулаймонов ҳам лавозимидан озод қилинган. У 2020 йилнинг сентябрь ойида вазир ўринбосари лавозимига тайинланган эди.
Маълумотга кўра, Ботиржон Сулаймонов Тошкент давлат аграр университети ректори лавозимида қолади.
Аввалроқ Сурхондарёда ҳайдовчига «ялинган» ЙПХ ходими, Тошкентда маст ҳолда жамоат тартибини бузган ички ишлар органи ходими ҳамда Давлат активларини бошқариш агентлигининг қатор ҳудудий бошқарма раҳбарлари фаолиятидаги камчиликлар туфайли лавозимдан озод қилингани ҳақида хабар берилганди.
Изоҳ (0)