Эстония бош вазири коррупция можароси фонида истеъфо берди

Эстонияда Марказ партиясининг раҳбари Юри Ратас Porto Franco компаниясига давлат томонидан имтиёзли кредит бериш тўғрисидаги жиноий ишда гумон қилингани сабаб бош вазир лавозимидан истеъфога чиқишини эълон қилди. «РБК»нинг хабар беришича, бу ҳақда у ўзининг Facebook’даги саҳифасида маълум қилди.

«Бугун эълон қилинган прокуратура гумони кимдир аниқ айбдор эканлигини англатмайди. Аммо улар барча иштирокчиларга муқаррар равишда жиддий соя солади. Бундай вазиятда барча ҳолатларга ойдинлик киритиш ва аниқликка эришиш имкониятини бериш мақсадида истеъфога чиқиш энг тўғри йўл бўлиб кўринади», — деб ёзган Ратас.

ERR порталининг маълум қилишича, 12 январь куни Эстония хавфсизлик полицияси Марказ партиясининг бош котиби Михаил Корб, молия вазирининг маслаҳатчиси Керсти Крахт ва тадбиркор Ҳиллари Тедерл жиноятда гумон қилинаётганини эълон қилди.

Эстония хавфсизлик полицияси маълумотига кўра, Тедер ва Корб келишувига асосан, тадбиркор маҳаллий сайловлар олдидан Марказ партиясига 1 миллион еврогача хайрия қилишга келишиб олган. Бунинг эвазига Корб Таллин мериясига таъсир ўтказиб, Тедерга тегишли Porto Franco фирмасига Таллинда қурилаётган объектларда чегирмали нархларда кириш йўлларини қуриш учун имконият яратиб беришни ваъда қилган.

Молия вазири маслаҳатчиси Керсти Крахт Тедерга вазирликдаги ваколатидан фойдаланиб, Porto Franco фирмаси таклифи бўйича ижобий қарор қабул қилишга келишиб олганликда гумон қилинмоқда. Бундан ташқари, мансабдор  кредит ажратишда қулай шартлар яратиб беришни ваъда қилган.

Эстония полициясининг маълумотига кўра, Кракт хизматлари учун Тедердан пора олиши керак бўлган. Аммо бизнесмен ва Крахт қўлга олингани сабабли бу амалга ошмай қолган. Улар, шунингдек, пора олишни яшириш мақсадида «пул ювишда»  гумон қилинмоқда.

Кимлиги ошкор қилинмаган яна икки шахс ҳам гумон қилинмоқда. Полиция маълумотларига кўра, улардан бири пора олди-бердисида ёрдам берган, иккинчиси мансабни суиистеъмол қилиш билан боғлиқ. Партия бош котиби Корбадан ташқари, барча гумонланувчилар қўлга олинган.

DW’нинг ёзишича, бош вазир истеъфосидан сўнг мамлакат президенти Керсти Калюлайд мухолифатчи Ислоҳотлар партияси раисига янги ҳукумат шакллантиришни топширди.