Фарғона вилоятида Cobalt русумли автомашина Фарғона канали чеккасига ўрнатилган бетон тўсиққа урилиб, каналга тушиб кетди, дея хабар бермоқда вилоят ИИБ.
Қайд этилишича, Фарғона вилоятининг Қўштепа тумани «Катта Болтакўл» қишлоғида канал бўйидан ўтган ички хўжалик йўлида тунги соат 23:15 ларда ЙТҲ содир бўлган.
Маълум қилинишича, 1995 йилда туғилган ҳайдовчи Cobalt русумли автомашина бошқарувини йўқотиш натижасида мазкур ҳудуддан оқиб ўтувчи Фарғона канали чеккасида ўрнатилган бетон тўсиққа урилиб, канал ичига тушиб кетган.
Оқибатда ҳайдовчи ва икки нафар йўловчи нафас йўлига сув кириши туфайли вафот этган.
Ҳодиса содир бўлган йўл ҳолати яхши бўлган, чуқурлар бўлмаган. Лекин йўл тунги ёритиш чироқлари билан жиҳозланмагани аниқланган.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Аввалроқ Самарқандда маст ҳайдовчи ўз бошқарувидаги Matiz билан каналга тушиб кетиши оқибатида машина ичида бўлган амакисининг умрига зомин бўлгани, Андижонда «Волга»нинг каналга тушиб кетиши оқибатида унинг салонидаги йўловчи ҳалок бўлгани ҳамда Сурхондарёда каналга тушиб кетган Nexia-3’да ёнғин чиқиши оқибатида бир оиланинг 4 нафар аъзоси вафот этгани ҳақида хабар берилганди.
Изоҳ (0)