Ижтимоий тармоқларда айни пайтда Ўзбекистон бозорларида 1 килограмми 40-45 минг сўмдан сотилаётган (хориждан импорт қилинган музлатилган) гўштнинг сифати ва қайси ҳайвонга мансублиги, истеъмолга шубҳали эканлиги тўғрисида хабарлар пайдо бўлди. Ветеринария ва чорвачиликни ривожлантириш давлат қўмитаси бундай хабарларга муносабат билдирди.
Қўмита хабарида айтилишича, 2020- йилнинг шу пайтига қадар озиқ-овқат хавфсизлигини таъминлаш мақсадида Ўзбекистоннинг импорт бўйича ветеринария талаблари асосида тадбиркорлар томонидан четдан жами 30082,4 тонна гўшт импорт қилинган.
Шундан, Қозоғистондан музлатилмаган 287,4 тонна майда мол ва 5712 тонна қорамол ҳамда 46,4 тонна музлатилган йирик шохли мол гўшти, Украинадан 2251,6 тонна музлатилган йирик шохли мол гўшти, Беларусдан музлатилмаган 7124 тонна ва музлатилган 14661,4 тонна қорамол гўшти олиб келинган.
Ўзбекистонга импорт қилинган ва қилинаётган гўшт маҳсулотлари келиб чиқиши тўғрисидаги хавфсизлигини кафолатловчи ҳужжатлар ва ветеринария сертификатларига кўра, ветеринария назорати остида киритилган ва киритиб келинмоқда.
Шунингдек, жисмоний шахслар томонидан ҳам чегара назорат ветеринария пунктлари орқали олиб ўтилаётган гўшт ва гўшт маҳсулотлари ветеринария-санитария норма ва талабларига мувофиқ олиб кирилиши қатъий назоратга олинган.
Қайд этилишича, савдо расталарига импорт қилинган гўштнинг 1 килограмми 40-45 минг сўм қилиб белгиланиши талаб ва таклифга кўра, бозор муносабатлари доирасида шакллантирилган.
«Ветеринария ва чорвачиликни ривожлантириш давлат қўмитаси импорт қилинган ёки ўзимизда етиштирилган гўшт ва гўшт маҳсулотларининг олди-сотдисида нархни белгилаш ваколатига эга эмас», — дейилади қўмита баёнотида.
Аввалроқ «Росселхознадзор» Ўзбекистонда ишлаб чиқарилган тайёр гўшт ва сут маҳсулотлари экспорти учун қўйилган вақтинчалик тақиқни бекор қилгани ҳақида хабар берилган эди.
Изоҳ (0)