«Навоийазот»нинг янги кимёвий мажмуасида илк карбамид маҳсулоти олинди

2016 йил сентябрь ойида «Навоийазот» АЖда қурилиши бошланган «Аммиак ва карбамид ишлаб чиқариш» мажмуасида барча ишлар якунланиб, 23 декабрь куни илк карбамид маҳсулоти олинди. Бу ҳақда «Ўзкимёсаноат» матбуот хизмати хабар берди.

Мажмуа Япониянинг Mitsubishi Heavy Industries Ltd ва Mitsubishi Corporation компаниялари консорсиуми билан ҳамкорликда қурилган. Ишлаб чиқариш технологиялари дунёнинг энг етакчи компаниялари, хусусан, аммиак ишлаб чиқариш бўйича Даниянинг Ҳалдор Топсоэ, карбамид ишлаб чиқариш бўйича Италиянинг Саипем компанияси ҳамда карбамид грануляцияси бўйича Германиянинг Uhde компаниялари етказиб берган. Асосий технологик ускуналар Япония ва Европадан келтирилади.

Мажмуада йилига 660 минг тонна аммиак ва 577,5 минг тонна карбамид ишлаб чиқарилади. Аммиакнинг 330 минг тоннаси янги карбамид ишлаб чиқаришга ва 330 минг тоннаси мавжуд аммиакли селитра ишлаб чиқаришга йўналтирилади. Лойиҳа тўлиқ қувватга чиққанда 1 триллион 428 миллиард сўмлик товар маҳсулот ишлаб чиқарилади ва кимё тармоғини 9,5 фоизга ўсишга олиб келади. Йилига бюджетга 600 миллиард сўм миқдоридаги тушумларини таъминлайди ҳамда 58 миллион долларлик қўшимча маҳсулот экспорт қилинади.

Лойиҳани амалга ошириш натижасида 1964 йилда қурилган, маънавий жиҳатдан эскирган, энергияси сарфи юқори бўлган «Навоийазот» АЖ 1- ва 2-аммиак ишлаб чиқариш цехлари фойдаланишдан чиқарилади.

«Ўзкимёсаноат»нинг таъкидлашича, мамлакат қишлоқ хўжалигининг карбамидга бўлган эҳтиёжи тўлиқ қопланади. Хусусан, ғалла ва пахта ҳосилини агротехник муддатларида гектарга қўшимча 100-150 килограммгача ўз вақтида карбамид минерал ўғити билан озиқлантириш имконини беради. Бундан ташқари, Марказий Осиё давлатлари, Афғонистон, Туркия, Украина ва Грузияга маҳсулот экспорт қилиниши режалаштирилган.