ПСЖ клуби бош мураббийи Томас Тухель истеъфога чиқарилди, деб хабар бермоқда Bild нашри.
RMC Sport’нинг ёзишича, германиялик мутахассис 23 декабрь, чоршанба куни ПСЖ спорт директори Леонардо билан учрашган. Унда мураббийнинг ишдан олингани маълум қилинган.
Тухелнинг парижликлар билан шартномаси 2021 йил ёзида якунига етарди. Bild’нинг таъкидлашича, мураббий Англия Премьер Лигасида фаолиятини давом эттириши мумкин.
RMC Sport манбасига кўра ПСЖнинг янги бош мураббийи «Тоттенҳэм» собиқ устози Маурисио Почеттино бўлади. Аргентиналик мутахассис Лондон клубини тарк этганидан бери (2019 йил кузи) ишсиз юрибди.
Тухель 2018 йилда ПСЖга бош мураббий этиб тайинланганди. У 2 йил вақт оралиғида жамоа билан 6 та совринга эга чиқди. Жумладан, икки карра Франция чемпионлигини қўлга киритди.
ПСЖ Лига 1 нинг 2020/21 йилги мавсумида мусобақа жадвалида айни чоғда 3-ўринда бормоқда. Жамоа пешқадамлар — «Лион» ва «Лилль»дан 1 очкога ортда қолмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)