Какао фойдаси беқиёс антиоксидант полифенолларнинг кони ҳисобланади. Полифеноллар организмни турли зарарланишлардан ҳимоя қилади, яллиғланиш ривожланиши, қариш жараёнининг олдини олади, терига ижобий таъсир қилади ва уни қуёшнинг ультрабинафша нурларидан ҳимоя қилади.
Какао қондаги азот оксиди миқдорини оширгани ҳисобига ҳам унинг истеъмолидан кейин артериал қон босим меъёрлашади. Шифокорларнинг маълум қилишича, ушбу мазали ичимликдаги флаваноидлар қон томирлари фаолиятини яхшилайди. Какао кукунининг B гуруҳи витамини ва К витаминига бой экани сабаб юрак-қон томир касалликларининг олдини олади, юрак мушаги ва қон томири деворлари мустаҳкамланади.
Калорияга бой эканига қарамай, унинг истеъмолидан кейин инсоннинг қомати ўзгармайди. Углеводнинг организмга сингиши меъёрда бўлади, тўқ тутгани сабаб иштаҳа камаяди, ёғларнинг оксидланиши тезлашади. Бир неча тадқиқотларда ҳақиқий какао ва паст кўрсаткичли ТМИ (тана массаси индекси) ўртасида боғлиқлик бор экани аниқланган. Бироқ унинг вазн камайишига таъсир қилиши учун меъёрни билиш, рацион ҳам тўғри бўлишига эътибор қилиш керак.
Таркибида «бахт гормони» серотонинининг вазифадоши триптофан борлиги сабаб ҳам какао кайфиятни кўтариш, депрессияга хос симптомларда ёрдам бериш хусусиятига эга. Уни ичгандан кейин буйракусти безларида пулсни жадаллаштирадиган, диққат ва эътиборни оширадиган модда — фенилэтиламин ишлаб чиқарилади.
Организмга юқорида таъкидланганидек ижобий таъсир қилиши учун уни сув ёки сут қўшиб қайнатиш керак. Қўшимча сифатида ёнғоқ, долчин (корица) қўшиш мумкин, шакардан эса иложи бўлса, воз кечган яхши.
Изоҳ (0)