Россия тўғридан-тўғри инвестициялар фонди (РТИФ) Ўзбекистондаги шерикларига ҳамкорликда инвестиция фонди тузишни таклиф қилди. «Gazeta.uz»нинг хабар беришича, бу ҳақда РТИФ бош директорининг биринчи ўринбосари Анатолий Браверман 4 декабрь куни икки мамлакат ишбилармон доиралари иштирокидаги давра суҳбатида маълум қилди.
«Россия ва Ўзбекистон Президентлари учрашувларида Яқин Шарқ ва Осиёнинг бир қатор давлатлари билан яратган фондлар ва платформаларимиз каби Россия ва Ўзбекистон ўртасида ҳамкорликда фонд тузиш борасида бир қатор муҳокамалар ўтказдик», — деган у давра суҳбати давомида.
Браверманнинг таъкидлашича, Россиянинг БАА, Саудия Арабистони, Хитой ва Япониядаги шериклари билан ҳам шундай фондлар мавжуд.
Инвестициялар ва ташқи савдо вазирининг биринчи ўринбосари Лазиз Қудратов учрашувда Ўзбекистон суверен фонди ҳисобланган Тикланиш ва тараққиёт жамғармасининг ижрочи директори Шуҳрат Вафоев иштирок этаётганини билдирган. «У мамнуният билан ушбу ҳамкорликдаги ҳаракат деталларини муҳокама қилади ва биз ўзаро мақбул ечимни топамиз», — деган Лазиз Қудратов.
Бош вазир ўринбосари, инвестициялар ва ташқи савдо вазири Сардор Умурзоқов томонлар бундай тузилманинг устувор йўналишлари ва иш йўналишларини белгилаб олиши кераклигини таъкидлаган. «Бу Mubadala (БААнинг суверен фонди) билан бўладиган ҳамкорликдан бироз фарқ қилади. У ерда ўзига хос жиҳатлар бошқача», — деган у.
Бунга жавобан Россия саноат ва савдо вазири Денис Мантуров «ўзига хос жиҳатлар бир хил» эканлигини айтган. «Ўзига хос жиҳатлар деярли бир хил. Гап шундаки, ушбу фондни яратишда ҳар бир давлатнинг ўзига хос хусусиятлари бор. Охир оқибат буларнинг барчаси суверен фондларнинг қўшимча даромадга эга бўлишига олиб келади», — деган Денис Мантуров.
2018 йилнинг октябрида Ўзбекистон ва БАА 1 миллиард қийматдаги тўғридан-тўғри инвестиция фонди тузганди.
Изоҳ (0)