Ҳафталик дайжест: Меценатлар ҳиммати, автомобилсиз бир кун, коронавирус вакцинаси Ўзбекистонда
Ғала-ғовур билан яна бир ҳафта ўтди. Дайжестимиз хабарларида яхшиси ҳам бор, нохуши ҳам, антиқаси ҳам. Сиз эса жойлашиб ўтириб олинг.
Собиқ тузумдан бери одат бўлиб келаётган «қўшиб ёзиш» (приписка) бугун ҳам тез-тез юзини кўрсатиб туради. Пахта етиштириш бўйича энг заифлардан бири Сурхондарё вилоятида 21,3 фоиз пахта қўшиб ёзилган бўлиши мумкинлиги айтилди. Хабар қилишларича, энг ажабланарлиси, ёғингарчилик кунлари ҳам Сурхондарёнинг «пахта хирмон»ларига хом ашё кирим қилинган.
Қишлоқ хўжалиги вазирлиги ҳисоботига кўра, Сурхондарё вилоятида пахта хом ашёсини топшириш бўйича режа 82,3 фоизга бажарилган. Вилоятдаги 535 та фермер хўжалиги пахта хом ашёси тайёрлаш ва топшириш режасини 50 фоизга ҳам бажармаган. Шеробод туманида — 205 та, Қизириқ туманида — 166 та, Шўрчи туманида — 50 та, Бандихон туманида — 37 та, Узун туманида — 29 та, Денов туманида — 19 та, Ангор туманида — 13 та, Жарқўрғон туманида — 10 та, Музработ ва Олтинсой туманларида учтадан фермер хўжалиги амалда режани 50 фоизга ҳам уддалай олмаган.
Аммо Сурхондарё вилояти прокуратураси бу хабарни рад қилди. «Мазкур топшириқ асосида амалга оширилган прокурор назорати тадбирлари натижасида келиб чиқиши мумкин бўлган пахта мавсумида ҳисоб-китоб масалаларида қўшиб ёзиш ҳолатларининг олди олинган. Чунончи, мазкур топшириқ юборилган вақтда пахта мавсуми давом этаётган бўлиб, якуний ҳисоб-китоблар ҳали тамомланмаган эди...», деб ёзади прокуратура.
* * *
Шавкат Мирзиёев ўтган йили меценатликни қўллаб-қувватлаш тўғрисидаги қонунни имзолаган эди. Ўтган ойда ҳуқуқшунос, блогер Хушнудбек Худойбердиевнинг ташаббуси билан «Меценат.у» лойиҳаси ишга тушди. Лойиҳа Ўзбекистондаги меценатларни жалб қилган ҳолда эҳтиёжманд ва иқтидорли талабаларнинг тўлов-контрактини тўлашга ёрдам бериш, шунингдек, стипендиялар эълон қилишни кўзда тутади. Ҳозиргача Ёшлар ишлари агентлиги, Ёшлар иттифоқи ва «Меҳрли қўллар» хайрия фонди барча талабалар учун жами 400 миллион сўмлик, «Xushnudbek.uz» Telegram-канали Тошкент давлат юридик университети талабалари учун жами 30 миллион сўмлик, «Нажот таълим» маркази тиббиёт соҳасида ўқиётган хотин-қизлар учун жами 15 миллион сўмлик грант эълон қилган бўлса, бу ҳафта улар сафига Самарқанд вилояти ҳокимлиги ҳам қўшилди. Самарқанддаги ОТМда ўқиётган талабаларнинг ўн нафари саралаб олиниб ярим йил давомида ҳар ой 1 миллион сўмдан стипендия бериб турилади. Стипендия дастурида иштирок этиш учун давлат гранти ёки тўлов-контракт асосида ўқишнинг аҳамияти йўқ. Ғолибларни саралашда номзоднинг аъло ўқиши, хорижий тилларни билиши, ижтимоий ҳаётда фаоллиги ва бошқа жиҳатлар инобатга олинади.
Ҳокимлик таълимга сармоя киритгани Trailblazer харид қилганидан кўра яхшироқдир.
* * *
Бу йил ҳокимлар ва умуман, раҳбарлар анча вазн ташлайдиган бўлди. Қорин айланасини ўлчаб борилиши ҳақида ўтган ҳафта ёзган эдик. Қуйидаги расмда Сирдарёда раҳбарлар вилоят ҳокими Ғофуржон Мирзаев бошчилигида спорт нормативлари топширмоқда.
Ҳуқуқий ахборот канали ёзишича, 2020 йил 1 декабрдан барча давлат органлари ва ташкилотлари ҳамда ҳокимлар ва ўринбосарларига «Шахсий намуна» тамойили асосида ҳафтада камида бир марта автомобиллардан фойдаланмаган ҳолда ишга келиши ва кетиш тавсия этилди. Ғарб давлатларидагидек вазирлар, ҳокимларни оддий фуқаро каби кўчада учратиб қоладиган кунларимиз яқинлашмоқда. Албатта, агар барча ҳамжиҳатликда амал қилса.
Дарвоқе, бу борадаги ҳукумат қарори раҳбарларнигина эмас, барчани кўзда тутган. Мактабларда спорт мусобақалари ўтказиш, «автомобилсиз кун» ташкил этиш, шаҳар, туман, маҳалла ва қишлоқларда пиёда ва велосипедчилар учун йўлаклар яратиш шулар жумласидан.
* * *
Монополияга қарши курашиш қўмитаси ва UzAuto Motors ўртасидаги суд иши тўғрисида кўп ва хўп ёзилди. Охири, UzAuto Motors судда ютиб чиққан ҳам эди. Аммо ҳормас-толмас антимонополчилар суд қарори устидан аппеляция шикоятини киритди ва суд иши яна қайтиб кўриладиган бўлди. Бу баҳс тарихи батафсил ушбу хабарда ёзилган. Жорий йилнинг 11 декабрь куни Тошкент шаҳар маъмурий суди UzAuto Motors’га боғлиқ ишни қайта кўриб чиқади. Шундай қилиб аччиқ ичакдек чўзилган суд ишини кузатишда давом этамиз.
* * *
Энергетика вазирлиги ҳар куни республикада электр энергияси ва табиий газ таъминоти ҳолати, ҳодисаларни ўрганиш ва чоралар кўришга, истеъмолчилар мурожаатларини таҳлил қилишга қаратилган чора-тадбирлар тўғрисида маълумот беришни бошлади, деб ёзмоқда «Davletov.uz». Youtubeдаги ушбу каналда республикада электр энергияси, табиий ва суюлтирилган газ ҳамда кўмир таъминоти ҳолати, истеъмолчилар мурожаатларини таҳлил қилишга қаратилган чора-тадбирлар тўғрисидаги кунлик маълумот ва амалга оширилган ишлар айтиб борилмоқда.
Энергетикага оид яна бир хабар. Ўзбекистонда маълум меъёрдан ортиқча ишлатилган электр энергияси учун устама жорий этилиши мумкин. Гарчи ток ўзи етарли берилмаётган бўлса-да, бу йўл билан исрофгарчиликларнинг олдини олишмоқчи.
* * *
Ҳафта ўрталарида Россия саноат ва савдо вазири Денис Мантуров Ўзбекистонга келди. Шавкат Мирзиёев жума куни уни қабул қилди. Денис Мантуров коронавирусга қарши «Спутник V» вакцинасини олиб келди.
Ўзбекистон Соғлиқни сақлаш вазирлиги сентябрь ойида Россия тўғридан-тўғри инвестициялар фонди (РТИФ) Ўзбекистоннинг LAXISAM фармацевтика компанияси билан мамлакатга 35 миллион доза «Спутник V» вакцинасини етказиб бериш бўйича келишувга эришганини маълум қилганди. 2020 йил охири ёки 2021 йил бошларида Ўзбекистон «Спутник V» вакцинасининг клиник синовларига киришиши айтилган.
* * *
Ўзбекистон Президенти Давлат хавфсизлик хизматига Алишер Усмонов янги раис этиб тайинланди. Алишер Аброрович Усмонов 1964 йилда туғилган. У илгари Давлат хавфсизлик хизмати раисининг ўринбосари бўлиб ишлаган. 2007 йилда II даражали «Шон-шараф» ордени билан тақдирланган.
Октябрь ойида Ўзбекистон Президенти Давлат хавфсизлик хизмати раиси сифатида фаолият юритиб келган Баҳодир Тошматов Президент ҳузуридаги Хавфсизлик Кенгаши котибининг ўринбосари этиб тайинланган эди. Алишер Аброрович Усмоновни ўзбек миллиардери Алишер Бурҳонович Усмонов билан адаштирмаслик жоиз.
«Дарё»ни ҳамиша кузатиб боринг ва энг қайноқ янгиликлардан хабардор бўлинг.
