ЖАРда 1 декабрь куни жекпот миқдори 7,4 миллион АҚШ долларидан кўпроқ бўлган PowerBall миллий лотереяси ўйналди. Олтита сондан иборат совринли комбинацияни бир вақтнинг ўзида 20 киши топишга муваффақ бўлган, деб хабар беради BBC.
Лотерея қоидаларида кўра, иштирокчилар 1 дан 50 гача бўлган сонлар орасида бешта асосий сонни, шунингдек, қўшимча яна бир сонни — PowerBall — 1 дан 20 гача бўлганлар орасидан танлаши керак. Жекпотни ютиш эҳтимоллиги 42 375 200/1 га тенг.
Лотереянинг трансляция видеосидан кўриш мумкинки, аввалига лотереяда 8, 5, 9, 7, 6 сонлари тушган, шундан сўнг эса PowerBall — 10.
Шу куннинг ўзида ЖАРдаги энг йирик лотерея оператори — Ithuba холдинги совринни қўлга киритган «20 нафар мультимиллионер»ни табриклаган. Шунингдек, компания совринли кетма-кетликка изоҳ ҳам берган: «Тушган сонлар кутилмаган комбинациядек кўриниши мумкин, бироқ лотереянинг кўплаб иштирокчилари айнан унга тикканини кўриб турибмиз».
Ҳар бир ғолиб 5,7 миллион ЖАР рэнди (370 минг доллар) миқдорида мукофотни қўлга киритган. Лотерея ташкилотчисининг Twitter’даги саҳифасига жойлаштирилган видеода ғолиблар ЖАРнинг еттита вилоятида истиқомат қилиши айтилган (мамлакатда 9 та вилоят бор). Хусусан, саккиз нафари Гаутенге — энг йирик Йоханнесбург шаҳри жойлашган вилоятда истиқомат қилади. Лотереянинг яна 79 нафар иштирокчиси 5 дан 9 гача бўлган кетма-кетликни аниқлаб, 6283 рэндни (409 доллар) қўлга киритган.
Congratulations to 20 new multimillionaires who each won over R5 million on the PowerBall jackpot! 5, 6, 7, 8, 9, 10 🙌 🤑 What will your winning numbers be? Check your tickets now to see if you’re a winner #FestiveYamaMillions pic.twitter.com/7DYpDjTL4R
— #PhandaPushaPlay (@sa_lottery) December 2, 2020
Twitter’даги фойдаланувчилардан бири «жин урсин, бу тасодиф эмас» деб ёзиб, ютуқли рақамлар олдинроқ эълон қилинганини билдирган. Кўпчилик содир бўлган воқеа текширилишини талаб қилган.
Лотерея бўйича ЖАР Миллий комиссияси ютуқлар чиққан рақамлар кетма-кетлиги «ноодатий, бироқ имконсиз эмас»лигини маълум қилган. Комиссиянинг таъкидлашича, мамлакатдаги барча лотереялар қаттиқ назорат остида бўлиб, уларнинг ҳаққоний ўтказилиши таъминланган. 1 декабрь кунги лотереяда тасодифий сонлар генераторидан фойдаланилган ва у идора мутахассислари кузатуви остида бўлган.
Лотереяда 20 кишининг ғолиб чиқиши — ЖАР учун камдан кам учрайдиган ҳолат. Сўнгги марта мамлакатда жекпот энг кўп иштирокчилар ўртасида 2003 йилнинг мартида тақсимланган — ўшанда 33 киши совринга эга чиққанди.
Изоҳ (0)