Шавкат Мирзиёев: Собиқ «ТАПОиЧ»ни тиклаш учун ҳали кўп ишларни амалга оширамиз

Шавкат Мирзиёев 4 декабрь, жума куни Россия саноат ва савдо вазири Денис Мантуров билан музокара олиб борганди. «Gazeta.uz»нинг хабар беришича, Президент музокарада «ТАПОиЧ» самолётсозлик заводининг тақдири муҳокама қилинганини айтди.

«Бугун биз шерикларимиз билан ‘ТАПОиЧ’ тақдири, унинг келажаги ҳақида суҳбатлашдик. Мен аста-секин сирларни ошкор қилишни бошлайман, чунки менинг ичимда ҳам алам бор. Дунёда самолётлар ишлаб чиқарадиган саноқли давлатлар бўлган. Афсуски, биз уни ўз қўлларимиз билан йўқ қилдик. Аммо биз уни тиклаш учун ҳали ҳам кўп ишларни амалга оширамиз», — деган давлат раҳбари.

«Бизда авиасозлар, ‘ТАПОиЧ’ бор эди. Уларнинг барчаси тарихда қолди, энди улар йўқ. Қандай муҳандислар, қандай ёшлар ишлаганди», — дея куйинган Президент.

Эслатиб ўтамиз, Чкалов номидаги Тошкент авиация ишлаб чиқариш бирлашмаси 1941 йилда пайдо бўлган — уруш бошланиши билан 1932 йилда Москва яқинидаги Химки шаҳрида ташкил этилган завод Тошкентга эвакуация қилинган. Завод сўнгги самолётлардан бирини 2012 йилда ишлаб чиқарган. Айни пайтда унинг асосий ҳудудида Тошкент механика заводи жойлашган.