АҚШнинг амалдаги президенти Дональд Трамп хавфсизлик бўйича собиқ маслаҳатчиси, Россия билан алоқалар бўйича ФҚБга ёлғон ахборот берганликда айбланган Майкл Флинни афв этди. Бу ҳақда у ўзининг Twitter’даги саҳифасига ёзиб қолдирган.
«Мен учун генерал Майкл Флинн афв этилганини эълон қилиш катта шараф. Уни ва оиласини бу билан табриклайман. Биламан, энди сиз Шукроналик кунини ажойиб нишонлайсиз», — дейилади твитда.
2017 йилда Майкл Флинн Россиянинг ўша вақтда Вашингтондаги элчиси бўлиб ишлаган Сергей Кисляков билан учрашуви тўғрисида ФҚБга ёлғон маълумот берганини тан олган. ФҚБ ходимлари Флинндан у дипломат билан Россияга қарши санкциялар жорий этилишини муҳокама қилган ёки қилмагани ҳақида сўраган. Трампнинг маслаҳатчиси муҳокама қилмадик, дея ёлғон сўзлаган.
Шундан кейин Трампнинг собиқ маслаҳатчиси тергов билан ҳамкорлик қилишга қарор қилган ва ўзини айбдор деб тан олган. Бироқ 2020 йил баҳорида АҚШ адлия вазирлигида ФҚБда Флинни сўроқ қилиш учун етарлича асос бўлмаган деган хулосага келинган. Эндиликда суд ҳокимияти Флинндан барча айбловларни олиш масаласини кўриб чиқмоқда. Флинн эса энди ўзини айбдор деб тан олмаслигини эълон қилган. Шу сабабли унга ҳукм чиқарилиши тўхтатиб қўйилган.
Майкл Флинн 2017 йилнинг 20 январидан 13 февралига қадар Трампнинг маслаҳатчиси лавозимида ишлаган.
The New York Times ёзишича, Дональд Трамп 25 ноябрь куни 28 кишини афв этган ва яна 16 кишининг жазосини енгиллаштирган.
Аввалроқ АҚШ президенти Дональд Трамп Шукроналик куни арафасида анъанавий равишда бир жуфт куркани афв этгани тўғрисида хабар берилганди.
Изоҳ (0)