Футболдан ташқари қизиқишлар, машиналар ва бир уюм реклама шартномалари. Беназир Жозе Моуриньо қандай ҳаёт кечиради?

Одатда мураббийлар омма билан кўп мулоқот қилмайдиган, ўз хаёлларига чўмган инсонлар бўлади. Бироқ ҳар соҳа ва жойда бўлгани каби, улар орасида ҳам истиснолар учраб туради. Айнан шундай истиснолар сирасига Жозе Моуриньо жуда мос тушади. Боиси у фаолиятининг илк йилларидан бошлаб, кўпчиликни ўзига қарата олган ва барча ишлаган жойларида қандайдир «саргузашт»ларни бошдан ўтказган. Беназирнинг (Моуриньо ўзига шундай таъриф беради) мухлисларига эса унинг майдондаги тактика ва чизиқлари, шунингдек, матбуот анжуманидаги теша тегмаган гапларидан ташқари, қандай ҳаёт кечириши, қайси автомобиллардан фойдаланиши ва қанча даромад кўриши ҳам қизиқ экани, шубҳасиз. Шундай экан, қуйида Жозе Моуриньонинг қандай ҳаёт кечириши ҳақида ҳикоя қиламиз.

Моуриньо қаерда яшайди?

Жозенинг «Тоттенҳэм»га ўтишига клубнинг Лондонда жойлашгани сабаб бўлгандек гўё. Чунки айнан Лондонда мураббийнинг ўз мулки мавжуд. Жозе Лондондаги уйини 2012 йилда сотиб олган. Ўша вақтларда эса у «Реал» бош мураббийи эди.

Ушбу уй учун Моуриньо 4,5 миллион евро сарфлаган. Уй эса «Челси» хўжайини Роман Абрамовичга тегишли эди. Айтишларича, Абрамович Моуриньонинг «Челси»га қайтиши учун уйнинг нархини арзонлаштириб берган экан.

Моуриньо қандай машиналарда юради?

Моуриньо машиналарни жуда яхши кўради, бироқ уларни бошқаришни унчалик ҳам хушламайди. Шунинг учун уни кўпинча орқа ўриндиқда кўриш мумкин.

Португалияликнинг гаражидаги илк автомобиль Aston Martin Rapide бўлиб, Жозе уни 2010 йилда «Интер» билан олтин ҳет-трикка (Италия чемпионати ва Кубоги ҳамда Чемпионлар Лигасида ғолиб бўлган) эришганида сотиб олган.

Бир мунча олдинроқ эса Роман Абрамович Жозега қиймати 320 минг доллар бўлган Ferrari 612 Scaglietti’ни совға қилган.

Шунингдек, унинг гаражида Jaguar F-Type Cоupe’ни ҳам кўриш мумкин. Эътиборга молик жиҳати, Моуриньо Jaguar брендининг юзи ҳисобланади.

Моуриньонинг шахсий ҳаёти?

Жозе доимий равишда барча интервьюларида у учун ҳаётдаги асосий нарса оила эканлигини айтиб келади. Мураббийнинг рафиқаси Жозедан икки ёш кичик Матилда Фариа. Жозе у билан болаликдан дўст бўлган, кейинчалик бу туйғу муҳаббатга айланган. Шу тариқа Жозе ва Матилда 1989 йилда турмуш қуришга қарор қилади. Етти йил ўтгач, жуфтлик қиз фарзандли бўлади, чақалоққа Матилда исми қўйилади. 2000 йилда эса оилада ўғил фарзанд дунёга келади, унга эса Жозе исми берилади. Кўриниб турибдики, эр-хотин исм танлашда унчалик ҳам бой фантазиясига эга эмас.

Моуриньонинг дўстлари ким?

Моурнинг хулқ-атвори туфайли у билан дўст бўлиш унчалик осон иш эмас. Шунга қарамай, унинг атрофида бир қатор инсонларни кўриш мумкин.

Булар орасида Португалия терма жамоасининг собиқ футболчиси Деку ҳам бор. Айнан Моуриньо уни Европа футболининг юлдузига айлантирган. Деку ҳанузгача Моур билан илиқ муносабатларни сақлаб қолган.

Моуриньонинг дўстларидан яна бири Марко Матерацци. Ҳа, бу ўша барчага машҳур-у маълум Матерацци жанобларининг худди ўзи. Марко «Интер»ни тарк этганидан сўнг дўстисиз анча қийналган экан.

Шунингдек, беназир 17 йил ёнма-ён ишлаган Руй Фариа билан ҳам илиқ муносабатларга эга. У Жозега барча клубларда ёрдамчилик қилган.

Моуриньо футболдан  ташқари нималарга қизиқади?

Моуриньонинг ёшини ҳисобга олиб (57), айтиш мумкинки, унинг ҳаётида улкан бир тадбирлар унчалик ҳам кўп эмас. У футбол ҳақида ўйламаётган вақтларда шунчаки диванда ётишни ва телевизор кўришни ёқтиради.

Таътил пайтида эса Жозе сув спорти билан шуғулланиши мумкин, аммо унчалик кўп вақт олмайди. Шунингдек, у Англиядаги кўп йиллик фаолияти орқали теннисга қизиқиб қолган.

Моуриньонинг даромади қанча?

Моуриньо «Тоттенҳэм»да «Манчестер Юнайтед»дагига нисбатан анча кам маош олади. Жозе 2019 йилнинг 20 ноябрь санасида Маурицио Почеттинонинг ўрнини эгаллаб, жамоа билан 2023 йилгача мўлжалланган шартнома имзолаганди. Клуб раҳбарлари унга йилиги 13 миллион евро тўлайди, «Манчестер»да эса бу кўрсаткич 20 миллион еврога тенг эди.

Бироқ Моуриньо сингари мураббийнинг «бор-йўғи» бу билан чекланмаслиги аниқ. Клубдаги маош Жозенинг асосий даромад манбайи эмас. «Беназир» EA Sports’нинг юзи ҳисобланади, шунингдек, унинг Adidas, Hublot соатлари, Jaguar, BT Sport, Lipton чойи, Аtlantis меҳмонхоналар тармоғи ва бошқа бир қатор компаниялар билан шартномалари бор. Умуман олганда, Моуриньо бир йил ичида фақат реклама шартномаларидан ўртача 40 миллион евро даромад кўради. Бу рақамларга эса оддий одамлар уёқда турсин, манаман деган футболчи ҳам ҳасад қилиши аниқ.