Профессионал бокснинг енгил вазн тоифасида (-55,2 кг) фаолиятини бошлаган ўзбекистонлик Абдулҳай Шораҳматов (2-0, 2 КО) 22 ноябрь, якшанба куни ўзининг иккинчи жангини ўтказди.
Шораҳматов Польша пойтахти Варшавада ташкил этилган бокс оқшомида мезбон Роберт Ниэдзведцкига (0-3-1) қарши рингга чиқди. Абдулҳайнинг иккинчи раундда кетма-кет йўллаган кучли зарбаларидан сўнг польшалик боксчи нокаут ҳолатига тушиб қолди.
Шу тариқа 6 раундга мўлжалланган жанг 2-раунддаёқ якунига етди. Таъкидлаш ўринли, ушбу жанг польшалик боксчи вазн меъёрини бажара олмагани учун -55,2 кг вазн тоифасида эмас, балки -57,1 кг вазн тоифасида ўтказилган.
Абдулҳай Шораҳматов эса профессионал боксдаги иккинчи жангини ҳам муддатидан аввал нокаут билан якунлашга эришди.
Эслатиб ўтамиз, ўзбекистонлик 24 ёшли боксчи профессионал боксдаги илк жангини 2020 йил 8 февралида филиппинлик Бенжи Эбидога қарши ўтказган ва рақибини 1-раунддаёқ нокаутга учратганди.
Қайд этиш жоиз, Шораҳматов Англиянинг Quensberry промоутерлик компанияси билан ҳамкорлик қилади.
Маълумот учун, Шораҳматов Uzbek Tigers жамоаси сафида WSB мусобақаси доирасида олтита жанг ўтказиб, уларнинг барчасида ғалаба қозонган. -56 кг вазн тоифасида уч марта Ўзбекистон чемпионига айланган. Шунингдек, у Ислом бирдамлик ўйинлари ғолиби саналади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!