Андижон вилояти Хўжаобод туманидан ўтувчи халқаро аҳамиятга эга А-373 автомобиль йўлининг 457-километрида ўлим билан боғлиқ транспорт ҳодисаси содир этилди, дея хабар бермоқда ЙҲХББ.
Маълум бўлишича, ЙТҲ Хўжаобод тумани, «Чироқчи» МФЙ, Соҳибкор кўчасида яшовчи 2001 йилда туғилган Сирожиддинов Хуршидбек Давронбек ўғли томонидан Spark русумли 60 Q 725 ОА давлат рақам белгили автомашинани бошқариб кетаётган вақтида содир этилган.
Ҳайдовчи автомобиль йўлининг белгиланмаган жойидан кесиб ўтаётган Хўжаобод тумани, «Ипакчилик» МФЙ, Аҳиллик кўчасида яшаган, туман халқ таълим бўлимига қарашли 14-умумтаълим мактаб ўқитувчиси Исоқова Шаҳзода Мамажонова ҳамда унинг ўғли 2012 йилда туғилган, 14-мактабнинг 2-синф ўқувчиси Тоҳиров Ҳожиакбар Қурбонбой ўғлини уриб юборган.
Оқибатда Исоқова Шаҳзода воқеа жойида вафот этган. Унинг ўғли Тоҳиров Ҳожиакбар оғир тан жароҳати олиб, шифохонада ҳаётдан кўз юмган.
Ҳодиса сабабларини ўрганиш натижасида воқеа содир бўлган ҳудуд аҳоли яшаш жойи бўлса-да, тунги ёритиш чироқлари билан ёритилмагани, шунингдек, 2019 йилда ҳайдовчилик гувоҳномасини олган ҳайдовчининг малакаси етарли эмаслиги ва белгиланганидан юқори тезликда ҳаракатлангани аниқланган.
Ҳолат бўйича Хўжаобод ИИБ ҳузуридаги Тергов бўлими томонидан жиноят иши қўзғатилиб, тезкор суриштирув ҳаракатлари олиб борилмоқда.
Аввалроқ Бухорода Lacetti йўлни кесиб ўтаётган ота-болани уриб кетгани, Попда Lacetti’нинг Damas’га урилиши оқибатида бир киши вафот этгани ҳамда Фарғонада Spark дарахтга урилиши натижасида ҳайдовчи ва йўловчи вафот этгани ҳақида хабар қилинганди.
Изоҳ (0)