«Реал» ҳимоячиси Серхио Рамоснинг Испания терма жамоаси сафида олган жароҳати тафсилотлари маълум бўлди. 34 ёшли футболчи Испания терма жамоасининг Германияга қарши ўйинида (6:0) жароҳат олган ва 42-дақиқада майдонни тарк этганди.
Marca хабарига кўра, ҳимоячининг ўнг оёқ сони мушакларида ёрилиш юзага келган. Жароҳатдан тикланишга 2-3 ҳафта вақт кетиши тахмин қилинмоқда. Рамос жамоасининг Ла Лига доирасида «Вильярреал» ва Чемпионлар Лигасида «Интер»га қарши ўйинларини ўтказиб юборади.
Мадридликлар Рамос Чемпионлар Лигаси доирасидаги «Шахтёр»га қарши ўйинга қадар тикланишига умид билдирмоқда. У 1 декабрда бўлиб ўтади. Бироқ бу мушак жароҳати бўлгани сабаб, барча айтилаётган муддатлар тахминий, холос.
Жорий мавсум Серхио «Реал» сафида Ла Лигада 8 ўйин ўтказиб, иккита гол уришга муваффақ бўлди.
Эслатиб ўтамиз, «Реал»нинг марказий ҳимоячиларидан айни вақтда фақат Рафаэл Варан ўйнашга тайёр. Начо жароҳатини тиклаётган бўлса, Эдер Милитао коронавирусдан эндигина фориғ бўлди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)