Спортнинг Taekwondo WTF тури бўйича Ўзбекистон чемпиони ва Осиё чемпионати совриндори бўлган 18 ёшли Ж. Jawa мотоциклини ўғирлаб кетди ва кейинчалик маҳалла профилактика инспекторига қилган қилмишини тан олиб мурожаат қилди. Бу ҳақда Қўқон шаҳар судининг судьяси Э.Ҳакимовнинг маълумотларига таяниб ЎзА хабар берди.
Хабарга кўра Ж. Ўзбекистон тумани ИИБ ЙҲХГга қарашли «Шодлик» МФЙ ҳудудида жойлашган жарима майдонида сақланаётган Jawa мотоциклни ўғирлик йўли билан олиб қочишга уринган.
Гумонланувчи 2020 йил 2 сентябрь куни соат 02:00 ларда мотоциклни ўғирлаб олиб чиққан ва йўлда кетаётганда қилган ишидан афсусланиб, ўзи яшайдиган маҳалла профилактика инспекторининг телефон рақамига қўнғироқ қилиб, қилмишини айтиб, айбини бўйнига олган.
Профилактика инспектори тегишли ҳужжатларни расмийлаштирган, шу тариқа мотоцикл яна жарима майдончасига, Ж. эса қамоққа тушган.
Суд мажлисида сўроқ қилинган Ж. мотоциклларга қизиққани сабабли шу ишни қилгани, уни бир кун ҳайдаб, кейин яна жойига олиб бориб қўймоқчи бўлганини билдирган.
«Мотоцикл эгаси суддан Ж.нинг келажагини барбод қилмасликни, агар у озодликдан маҳрум қилинадиган бўлса, ўша мотоциклини керак бўлса ёқиб юборишини, Ж. содир этган жиноят натижасида ҳеч қандай моддий зарар кўрмагани, уни кечирганини айтиб, озодликдан маҳрум қилиш билан боғлиқ бўлмаган енгилроқ жазо тайинлашни сўраган», – дейилади хабарда.
Ж. ўзининг жиноий ҳаракатлари билан Жиноят кодексининг 267-моддаси 2-қисми «г» бандида (транспорт воситасини талон-торож қилиш мақсадида ўғрилик ёки талончилик йўли билан олиб қочиш) кўрсатилган жиноятни қасддан содир этган. У Жиноят кодексида белгиланган модда санкцияси доирасида 10 йилдан 15 йилгача озодликдан маҳрум қилиниши мумкин эди.
Лекин суд Ж.га жазо тайинлашда содир этилган жиноятнинг хусусияти жабрланувчига зарар етказилмагани, унинг университет талабаси экани, спортда эришган ютуқлари, айбини бўйнига олиш тўғрисида арз ва пушаймонлигини ҳисобга олди.
Шунингдек, Ўзбекистон Ёшлар ишлари агентлиги Фарғона вилоят кенгаши томонидан берилган ижобий тавсифнома ҳисобга олиниб, Жиноят кодексининг 57-моддасини қўллаб, модда санкциясида назарда тутилмаган озодликни чеклаш жазоси тайинлаш, Ж.га кеч соат 21:00 дан эрталаб соат 06:00 гача яшаш жойидан чиқмаслик, назорат қилувчи органнинг розилигисиз яшаш ва ўқиш жойини ўзгартирмаслик каби тақиқларни юклаб, қамоқдан озод қилиш юзасидан қарор чиқарилди.
Аввал Наманганда икки эркакни дўппослаган Гулсанам Алижоновага нисбатан Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилгани, кейинчалик иши тугатилгани ҳақида хабарлар берилган.
Изоҳ (0)