Бразилиянинг соғлиқни сақлаш бўйича назорат агентлиги Anvisa Хитойнинг Sinovac компанияси томонидан яратилган коронавирусга қарши вакцина Coronavac’нинг синовларини«жиддий ҳодиса» сабабли вақтинча тўхтатди. Бу ҳақда «РИА Новости» хабар берди.
Anvisa агентлиги синов иштирокчиларининг бирида вакцинанинг салбий таъсири кузатилгани ҳақидаги маълумотни 29 октябрь куни олган, ҳодисанинг тафсилотлари маълум қилинмаган.
«Жиддий ҳодиса» сифатида беморнинг ўлими ёки ўлим хавфи, ногиронлиги, касалхонага ётқизилиши, инфекциянинг тиббий қурилма орқали юқиши ёки клиник аҳамиятга эга ҳодиса қаралади.
Coronavac вакцинаси Бразилияда клиник тадқиқотларнинг учинчи босқичидан ўтказилмоқда ва унда минг киши қатнашмоқда. Вакцинани қабул қилган кўнгиллилар тадқиқотчилар назорати остида қолади.
Аввалроқ Буюк Британиянинг AstraZeneca ва АҚШнинг Johnson&Johnson компаниялари томонидан яратилган коронавирусга қарши вакциналарнинг клиник синовлари тўхтатилганди.
Эслатиб ўтамиз, аввалроқ Бразилия Соғлиқни сақлаш вазирлиги Хитойнинг Sinovac Biotech компаниясидан Coronavac вакцинасининг 46 миллионта дозаси харид қилинишини маълум қилган, вакцинани етказиб бериш 2021 йилнинг январь ойида бошланиши керак эди. Кейинроқ Бразилия президенти Жаир Болсонару мамлакат Соғлиқни сақлаш вазирлиги томонидан имзоланган Хитойда яратилган COVID-19’га қарши вакцинани сотиб олиш ҳақидаги шартномани бекор қилгани ҳақида хабар берилганди.
Октябрь ойида Ўзбекистон Инновацион ривожланиш вазирлиги Хитойнинг Анҳуи Зҳифеи Лонгcом Биопҳармаcеутиcал компанияси билан Ўзбекистонда коронавирусга қарши вакцина синовининг учинчи босқичини ўтказиш ҳақида келишувга эришди. Синов 5000 нафар кўнгиллида ўтказилади. Аввалроқ Хитой вакцинаси Тошкентга олиб келингани маълум бўлди.
Инновацион ривожланиш вазири Иброҳим Абдураҳмоновнинг хабар беришича, коронавирусга қарши вакцинани синовдан ўтказиш учун нафақат Хитойдан, балки Россия, Европа ва АҚШдан олиб келиш режалаштирилмоқда.
Изоҳ (0)