Уй-жой коммунал хизмат кўрсатиш вазирлиги «Иссиқлик таъминоти тўғрисида»ги қайта ишланган қонун лойиҳасини муҳокамага қўйди.
Norma’нинг ёзишича, «Кўп жойлари тўлдирилган ва тузатилган, бироқ истеъмолчиларнинг ҳамма таклифлари ҳам инобатга олинмаган». Аввалроқ нашр лойиҳанинг эски версияси шарҳини эълон қилганди.
Лойиҳанинг янги вариантида ёзилишича, истеъмолчилар бошқа иссиқлик таъминоти ташкилотлари билан мустақил равишда шартнома тузишлари мумкин. Шу билан бирга, коллектив иссиқлик таъминоти тизимида иссиқлик энергияси истеъмолчиси хонанинг бир қисмини иссиқлик таъминоти тизимидан узиб қўйишга ҳақли эмаслиги тўғрисидаги норма қолдирилган.
«Ушбу нормалар маъноси жиҳатдан зиддиятли ва иссиқлик таъминоти ташкилотига монопол ҳолатни беради, аҳолининг муайян қисмини манфаатсиз ҳолатга қўяди. Квартира эгаси ўз хонасида иссиқлик йўқотилишини камайтирувчи ва энергияни тежовчи замонавий иситувчи ускуналарни ўрната олмайди, ХУМШ эса бундай шарт-шароитларда ўзининг қозонхонасини қуришга қарор қилиши амри маҳолдир», — дейилади шарҳда.
Ҳужжат лойиҳасига мувофиқ, иссиқлик таъминотини ривожлантириш бўйича давлат сиёсатининг асосий йўналишлари қуйидагиларни ўз ичига олади: шаҳар ва аҳоли пунктларини иссиқлик билан таъминлаш схемаларини ишлаб чиқиш ва амалга ошириш, замонавий иссиқлик тармоқларини жорий этиш, қайта тикланадиган манбалардан фойдаланиш ва давлат-хусусий шериклик алоқаларини ривожлантириш ҳисобига энергия сарфини камайтириш.
Қонун лойиҳасида иссиқлик таъминоти жараёнининг барча иштирокчилари — истеъмолчилар, иссиқлик таъминоти ташкилотлари, давлат ва маҳаллий ҳокимиятларнинг шартнома талабларини бажариш жавобгарлиги, ҳуқуқлари ва мажбуриятларига изоҳ берилган. Шунингдек, ҳужжатда, иссиқлик таъминоти тарифларини шакллантириш ва истеъмолчилар томонидан иссиқлик йўқотишларини камайтиришни рағбатлантириш тўғрисидаги маълумотларнинг шаффофлиги каби нормалар келтириб ўтилган.
Изоҳ (0)