iPhone 12 кун охирига бормай «ўлиб қоляпти». Смартфоннинг илк эгалари янги қурилманинг ишлаш вақтидан шикоят қилмоқда

23 октябрь куни iPhone 12 ва iPhone 12 Pro смартфонлари сотувга чиқди. Бунга қадар интернетда янги флагманга оид тестлар ҳам пайдо бўлгани тўғрисида хабарлар берилди. Бироқ энди ижтимоий тармоқлар фойдаланувчилари смартфонларнинг қувватидан шикоят қилмоқда, деб ёзади IXBT.

Кўплаб фойдаланувчиларнинг маълум қилишича, iPhone 12 ва iPhone 12 Pro қуввати узоққа етмаяпти, хусусун, бир марталик қувватлантириш орқали олинган заряд ўйин ўйналса ёки видеороликлар томоша қилинса, ҳатто кун охирига бормай тугаб қолмоқда.

iPhone 12 ва iPhone 12 Pro’га сиғими 2815 мА/соатга тенг аккумуляторлар ўрнатилган. Бундан олдинги моделлар — iPhone 11 ва 11 Pro’ларнинг аккумулятор сиғимлари мос равишда 3310 ва 3046 мА/соатга тенг эди. Apple компанияси iPhone 12 бир марталик қувватланиш билан ишлайдиган вақти iPhone 11’никидан қолишмаслигини расман айтган бўлса-да, тест натижалари ва фойдалувчиларнинг изоҳи бунинг аксини кўрсатмоқда.

Тестларнинг бирида iPhone 12 ва 12 Pro бир марта қувватланиш орқали мос равишда 6 соат 42 дақиқа ҳамда 6 соат 34 дақиқа ишлаган. iPhone 11 Pro’да ушбу муддат 7 соат 36 дақиқани ташкил этади.

«Балки iPhone 12 Pro Махънинг натижаси яхшироқ чиқар, аммо митти iPhone 12 Mini’ни ҳам унутмаслик керак», — дейилади хабарда.