24—25 октябрь санасида Европа футболида шу қадар воқеликлар кўпки, уларни бирма-бир санаш бироз вақт олади. Аммо улар ичида футбол ихлосмандларинининг эътиборини четда қолдирмайдиганларидан бири, шубҳасиз, Англия Премьер Лигаси 6-туридан ўрин олган марказий баҳс — «Манчестер Юнайтед»—«Челси» тўқнашувидир. Қуйидагиларнинг барчаси эса шу ўйинга оид бўлади.
Жамоаларнинг ҳолати
«Манчестер Юнайтед»Англияда янги мавсум бошидан бери энг кўп муҳокамалар марказида бўлаётган клуб — «Манчестер Юнайтед»дир. «Қизил иблислар» аввалига «Кристал Пэлас»га 1:3 ҳисобида ютқазиб, ўз мухлислари олдида уятга қолди. «Брайтон»га қарши учрашув эса ўйиндан сўнг белгиланган пенальти билан эсда қолди. Ҳаммасидан ҳам «Тоттенҳэм»дан қабул қилиб олинган, 1:6 ҳисобидаги қақшатқич мағлубият ўтиб тушди. Бу ҳолатларнинг барчаси «Юнайтед»нинг воқеалар марказида бўлишини таъминлагани ҳам айни ҳақиқат. «Ньюкасл» билан ўйиндаги ғалаба (4:1) эса мухлисларга бироз таскин берган бўлса, Чемпионлар Лигасида ПСЖнинг сафарда мағлуб этилиши (2:1) уларга умидни қайтарибгина қолмай, бош мураббий Сульшернинг қимирлаб қолган курсисини яна ўз ҳолига қайтаргандек бўлди. «Челси»га қарши ўйин эса нафақат футболчилар, балки Сульшер учун ҳам мухлислар ва раҳбарият олдида юзи ёруғ бўлиши учун катта имкониятдек кўринмоқда.
«Челси»
Фрэнк Лэмпард бошчилик қилаётган Лондон жамоасининг таркибига унча-мунчаси ҳавас қилаётган бўлса ҳам, аммо унинг ўйини ва мусобақа жадвалида эгаллаб турган ўрни ҳақида бундай деб бўлмайди. «Челси» ўз таркибини мавсум аввалида Ҳаким Зиёш, Каи Ҳаверц, Тимо Вернер, Тиаго Сильва, Чиллуэл каби футболчилар билан тўлдириб олди. Қовунлар туширавериб умидни оқламган дарвозабон Кепанинг ўрнига Эдуард Менди ҳам олиб келинди. Бироқ ҳозир «Челси»нинг ўйинини барқарор эмаслигини у қайд этаётган натижалар ҳам кўрсатиб турибди. Сермаҳсуллик борасида гап бўлиши мумкин эмас. Аммо ҳимоя чизиғида хатолар керагидан кўплиги кўриниб қолишда давом этмоқда. «Вест Бромвич» ва «Саутҳэмптон»га қарши баҳслардаги 3:3 ҳисоблари ҳали ҳимояда қилинадиган ишлар жуда ҳам кўплигини кўрсатиб турибди.
Жамоаларнинг АПЛ 5-туридан сўнг мусобақа жадвалидаги ўрни эса қуйидагича: «Челси» 8 очко билан 9-ўринда бормоқда. Битта кам ўйин ўтказган «Манчестер Юнайтед» эса 6 очкоси билан 15-ўриндан жой олган.
Статистика
«Манчестер Юнайтед»—«Челси» қарама-қаршилиги статистикаси
Ўзаро ўйин — 188«Ман Юнайтед»да ғалаба — 78«Челси»да ғалаба — 54Дуранг — 56Тўплар нисбат — 297:227«Ман Юнайтед»нинг энг йирик ғалабаси — 6:0«Челси»нинг энг йирик ғалабаси — 5:0
Йўқотишлар ҳақида
Антони Марсиял ва Эрик Байини ҳисобга олмаса «Манчестер Юнайтед» сафида катта йўқотишлар йўқ. ПСЖга қарши ўйинга олиб кетилмаган Эдинсон Кавани эса лондонликларга қарши баҳсда жамоасига ёрдам бериши мумкин. «Челси»да ҳам кадрлар муаммоси йўқ. Фақатгина Билли Гилмор жамоасига ёрдам бера олмайди, холос.Тахминий таркиблар
«Манчестер Юнайтед»: Де Хеа, Магуайр, Линделёг, Уан-Биссака, Теллес, Погба, Мактоминей, Бруну Фернандеш, Мата, Рэшфорд, Жеймс.
«Челси»: Менди, Сильва, Зума, Чилуэлл, Аспиликуэта, Канте, Жоржиньо, Ҳаверц, Маунт, Пулишич, Вернер.
АПЛ6-тур баҳси24 октябрь, шанба
«Манчестер Юнайтед»—«Челси» 21:30
Изоҳ (0)