Асли Энвер 1984 йил 10 майда Лондонда туғилган. Аслининг отаси кипрлик, онаси эса Истанбулдан. Жуфтлик Англияда учрашди ва шу сабабли Асли ватанидан узоқ жойларда дунёга келган.
Болалиги
Асли 12 ёшигача оиласи билан Лондонда яшади ва шундан сўнг Истанбулга қайтди. Аслининг ота-онаси кўп ўтмай ажрашишга қарор қилди. Асли эса икки акаси билан онасининг ёнида қолди. Аслининг оиласи билан Истанбулга кўчиб келганидан сўнг у ерга мослашиши қийин бўлган. Сабаби у туркчани билмасди, уни ўрганиши керак эди.
«Аввалига ҳаётимда бўлаётган ўзгаришлар мен учун қийинчиликлар туғдирган. Мен ўшанда 12 ёшда эдим. Биз Истанбулга кўчиб келганимизда ҳеч нарсани тушунмаганман, туркчада ёзиш, ўқишни-ку умуман айтмаса ҳам бўлади.
Онам мени Муждат Гезен театр мактабига юборишга қарор қилди. Тез орада у ердаги болалар билан дўстлашиб кетдим. Орадан бир ҳафта ўтиши билан менга бошқа ҳеч нарса керак эмаслигини англадим. Ўз орзуларим амалга ошишига яқин эканлигини тушуниб етгандим. Чунки болалигимдан актриса бўлишни, театрда роль ижро этишни яхши кўрардим», − дейди актриса.
Таълим
Асли Энвер санъатга муҳаббати туфайли тасвирий санъат мактабида таҳсил олди. Кейинчалик Халич университетининг театр факультетини тамомлади.
Асли Энвер ўзининг характерини қуйидагича таърифлайди:
«Илгари мен уятчан бўлганман. Лекин дўстларим даврасида ўзимни эркин ҳис этаман. Аммо ташқи кўринишим бунга унчалик ҳам мос келмайди. Вақт ўтиши билан ўзим учун муаммолар яратиш беҳуда эканлигини англадим. Мен қандай бўлсам, шундайлигимча эдим. Бирор нарсани яширишни, бўрттиришни билмаганман. Ўттиз ёшдан ошгандан кейин эса ўзимни янада эркин ҳис қила бошладим».
Табиатан қувноқ инсонман. Мен билан мулоқот қилиш осон, албатта. Ҳар қандай муаммони суҳбат орқали ҳал қилишга устаман. Ўзимни ифодалашда бирор муаммо йўқ.
Ўқишдаги муаммолар
Асли Энверда дислексия мавжуд эди, у ўқишда қийинчиликка учрашини ўзи ҳам тан олади.
«Мен ҳаттоки сценарийларни ҳам қаламсиз ўқий олмайман. Планшетда ўқиганда ҳам қаторларнинг остига чизишим керак. Бу жуда қийнаб юборади. Шунинг учун кўпроқ аудиоматнлар тинглайман. Таржимаи ҳолларни ўқишни яхши кўраман, аммо бу осон эмас. Билимимни ошириш учун кўплаб ҳужжатли фильмларни томоша қиламан», дея қўшимча қилади Асли.
Шунингдек, Асли Энвернинг манзил топишида хотираси бироз суст. У 10 марта ташриф буюрган жойини ҳам кейинги сафар топа олмаслиги мумкин.
Ҳаётга ва муҳаббатга қараш
Актрисанинг фикрига кўра, чинакам жуфтликлар бир-бирини ўзгартиришга ёки иккинчи ярми учун ўзгаришга уринмаслиги керак.
«Кимлигидан қатъи назар, у учун ўзини хурсанд қиладиган нарсадан воз кечиши ғалати, албатта. Иккиси ҳам ўз ҳолича қолиши керак. Ёқмаган одатлар учун муросага келган маъқул. Севги бўлсагина бунга куч топиш мумкин», деб таъкидлайди юлдуз.
Шунингдек, у айни дамларда инсонлар бир-бирига шафқатли бўлиш ўрнига кўпроқ қоралаш билан оворалигидан ҳайратда. Актриса буни жамиятнинг асосий муаммоси деб билади.
Карьераси
Актриса ҳар қандай касбнинг муваффақиятида истеъдод ва узлуксиз машғулотни муҳим деб билади. Актёр учун биринчи ўринда истеъдод бўлиши керак, агар у яхши таълим олган бўлса, икки карра яхши. Аммо шунчаки чирой бўлса-ю, истеъдод, касбга доир билимлар етарли бўлмаса, ундан тайинли санъат инсони чиқмаслиги эҳтимоли кўпроқ, деган фикрда.
Актриса ўз касбини яхши кўради ва ҳеч қачон бу фаолиятни тарк этаман, деб ўйламайди.
Келажак ҳақида орзулар
Турк киноси юлдузи келажак ҳақида жуда оддий орзу қилади – бахтли бўлиш. Шунингдек, унинг учун энг муҳим нарса – ички хотиржамлик.
Асли сўнгги пайтларда тўғри овқатланиш ва спортга кўпроқ аҳамият бера бошлади. У сабзавотлар истеъмол қилишга одатланган. Макарон маҳсулотини эса ратционидан чиқариб юборган. Спорт билан мунтазам эмас, қачонки вақти топганида шуғулланади. Лекин бокс уни тетиклаштиради ва рағбатлантиради. Актриса табиат қўйнида вақт ўтказишни яхши кўради. Шунингдек, соҳилдан кўра ўрмонда сайр қилишни ёқтиради.
Актриса деярли гаджетлардан фойдаланмайди, фақатгина иш юзасидан уларни ишлатиши мумкин. Айниқса, Instagram саҳифасида ҳам фаол эмас, гарчи 6 миллион обуначиси бўлса-да. Шунингдек, саҳифага ҳар куни сурат жойлаштириш Асли учун эмас.
Унинг севимли шаҳри – Лондон. Асли, албатта, бирор нарса сотиб олиши керак бўлгандагина дўконга боради. Интерьер дизайнга жуда қизиқади, уйида ҳам ҳамиша энг кичик деталларни ўзгартириб туришга ҳаракат қилади.
Изоҳ (0)