Сирдарё вилояти ҳокими Ғофуржон Мирзаевнинг фикрича, Тошкент шаҳрининг кенгайиши ҳисобга олинса, пойтахтнинг келажаги Сирдарё вилоятида. Вилоят ҳокими бу фикрни 14 октябрь куни бўлиб ўтган Халқаро пресс-клуб сессиясида билдирди, деб ёзмоқда «Gazeta.uz».
Ҳокимнинг сўзларига кўра, географик жойлашув ва логистика масаласи бўйича Сирдарё вилояти катта завод ва фабрикалар учун энг қулай жой ҳисобланади.
«Тошкентликлар хафа бўлмасин. Тошкентнинг келажаги Сирдарё деганман. Сабаби энг қулай йўлда жойлашганмиз. Тошкентда барибир шаҳар кенгаяди, эртага у ердан завод-фабрикаларни, экологик томондан ҳам, Тошкент шаҳридан кўчиришга тўғри келади. Қаерга келади шулар? Албатта, узоқроқ ҳудудга келади», — деди ҳоким.
Шунингдек, вилоят раҳбаридан унинг Сирдарё вилояти иккинчи Америка бўлиши ҳақидаги гапларини изоҳлаш сўралди. 2019 йилнинг августда, I Халқаро инвестиция форуми доирасида журналистлар билан мулоқотда Ғофуржон Мирзаев Сирдарё чўлларини обод қилиш мақсадида водий, Жиззах, Самарқанд, Бухоро ва Ўзбекистоннинг деярли барча ҳудудларидан аҳоли вакиллари келганини айтганди.
«Шунинг учун кўпчилик менга ушбу вилоятда ишлаш қийин бўлади, деб айтганди. Мен уларга, демак, биз иккинчи Америка бўлар эканмиз-да, деб айтганман. Сабаби Америка ҳам турли минтақалардан келганлар жамоасидан ташкил топган», — деган эди Мирзаев форумдаги нутқида.
Ғофуржон Мирзаевнинг айтишича, кўпчилик унинг бу гапларини тўғри тушунмаган ва у бундан хафа бўлмаган.
«Қаерда рақобат бўлса, қаерда кураш бўлса, қаерда тортишув бўлса, ўша ерда ўсиш бўлади. Бундан қўрқмаслигимиз керак», — дея таъкидлади ҳоким.
Давлат статистика қўмитаси маълумотларига кўра, 2020 йил январь—июнь ойларида Сирдарё вилоятининг ҳудудий ялпи ички маҳсулоти 4,8 триллион сўмни ташкил этган, бу мамлакат вилоятлари орасидаги энг паст кўрсаткич ҳисобланади. Вилоят Ўзбекистон ЯИМнинг шаклланишида энг кичик улушга эга (1,9 фоиз).
Эслатиб ўтамиз, Президент Шавкат Мирзиёев Сардоба сув омбори тўғони ёрилганидан буён ўтган даврда амалга оширилган бунёдкорлик ишлари билан танишиш мақсадида 13 октябрь куни Сирдарё вилоятига борди. Президент дастлаб Мирзаобод туманидаги «Янги Ўзбекистон» деб қайта номланган «Ҳақиқат» маҳалласида қурилган янги уйларни бориб кўрди.
Шундан сўнг давлат раҳбари сафари давомида Оқолтин туманида сув тошқинидан зарар кўрган пахта даласида бўлиб, ҳосилни кўздан кечирди. Шунингдек, Президент Оқолтин тумани аҳолиси билан суҳбатлашди.
Кейин эса Шавкат Мирзиёев Сардоба туманидаги янги қурилган «Сардоба Оқсарой текстиль» корхонаси фаолияти билан танишди, туманнинг «Дўстлик» маҳалласида қурилган янги уйларга ташриф буюрди.
Шунингдек, давлат раҳбари сув тошқинидан жабрланган одамлар билан учрашди.
Изоҳ (0)