Наманган вилояти ҳокими вазифасини бажарувчи Шавкат Абдураззоқов «Навбаҳор» жамоасининг айрим мухлисларини танқид остига олди ва бундан буён тартибсизликлар келтириб чиқарган ишқибозлар жазога тортилишини маълум қилди.
«Мухлисларга шуни эслатмоқчиманки, ишқибоз регламент ва қоидаларга асосан мухлислик қилиши, жамоанинг ички ишларига умуман аралашмаслиги лозим. Бундан буён мухлислик қоидаларини бузганлар «қора рўйхат»га олинади ҳамда умуман стадионга киритилмайди.
Мен ҳам ёшлигимда футболга қатнаганман ҳамда футболни жуда яхши тушунаман. Футболчи ҳам инсон, айрим вазиятларда адашади. Шундай ҳолатларда ўйинчини ҳимоя қилиш ўрнига айрим мухлислар уни ҳақорат қилади. Бу эса футболчига салбий таъсир кўрсатади», — дейди Абдураззоқов.
Эслатиб ўтамиз, вилоят раҳбари 7 октябрь куни «Навбаҳор» қароргоҳида йиғилиш ўтказди. Унда клубнинг стратегияси буткул ўзгариши ва эндиликда жамоа фақат маҳаллий ёшларга таяниши айтилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)