Халқ депутатлари Жалақудуқ туман кенгашининг олтинчи чақириқ, ўн тўртинчи сессиясидан сўнг сектор раҳбарлари ҳамда Президент Администрацияси ҳузуридаги Ахборот ва оммавий коммуникациялар агентлиги директорининг биринчи ўринбосари Дилшод Саиджонов иштирокида оммавий ахборот воситалари ходимлари учун матбуот анжумани ўтказилган. Бу ҳақда «Дарё» мухбири хабар берди.
Ўзбекистон Президентининг «Ҳудудларни ижтимоий-иқтисодий ривожлантиришни рейтинг баҳолаш тизимини жорий этиш тўғрисида»ги қарорига асосан маҳаллий ҳокимият органлари сайтларининг оммавийлиги даражаси ҳам баҳоланиши белгиланган. Матбуот анжуманида «Дарё» мухбири Дилшод Саиджоновдан ушбу рейтинг натижалари қачон эълон қилинишини сўради.
«Матбуот хизматлари тизими бизнинг Агентлик томонидан ўтган йилнинг июнь ойида яратилган. Бу Президентимиз томонидан илгари сурилаётган очиқлик сиёсатининг асоси десак янглишмаган бўламиз. Очиқлик сиёсати Ўзбекистонда иккита йўл билан амалга оширилади. Яъни биринчи томонда оммавий ахборот воситалари, иккинчи тарафда эса давлат органлари туради. Барчамизга маълумки, 2014 йилда ‘Давлат ҳокимияти ва бошқаруви органлари фаолиятининг очиқлиги тўғрисидаъги қонунимиз қабул қилинган.
Бироқ қонун ижросини таъминлашда бир қатор қийинчиликлар вужудга келарди. 2019 йил 27 июнда қабул қилинган қарор эса қонунинг яхшироқ ишлашига йўл очиб берди. Қарорга асосан Агентлик томонидан матбуот хизматларининг фаолиятини мувофиқлаштириш, қандай ишлаётганига баҳо бериш, моддий-техник база ва етарли ойлик маошлари билан таъминланганлигини аниқлаш, улар юритаётган веб-сайтларни мониторинг қилиш белгиланган. Вазифамиз доирасида вазирлик ва идоралар, ҳокимликлар ҳамда Ўзбекистонинг элчихоналарининг сайтларини аниқ ҳолатини ўрганиб чиқиб, рейтинг тузилган. Натижалар бўйича тегишли ҳужжат Вазирлар Маҳкамасига киритилган. Октябрь ойи давомида Бош вазир иштирокида йиғилиш ўтказилиши белгиланган. Унда барча матбуот хизматларининг фаолиятига баҳо берилади ва шунга асосан тегишли чоралар кўрилади», — деди Дилшод Саиджонов.
Президентнинг 2019 йил 27 июндаги қарорига асосан агентлик зиммасига давлат органлари ва ташкилотларидаги ахборот хизматлари ходимлари ва раҳбарларининг малакасини ошириш курсларини ташкил этиш белгиланган бўлса-да, нега қарор ижроси таъминланмаётгани ҳақида сўраган «Дарё» мухбирига Саиджонов қуйидагича жавоб берди: «Агентлик режасида ҳудудлардаги ахборот хизмати раҳбарлари ҳамда ходимлари иштирокида семинар-тренинглар ўтказиш бор. Барча тренерлар тайёр. Бироқ, пандемия сабабли ортга сурилмоқда. Бирданига юзлаб матбуот котибларини Тошкентга чақиришнинг имкони йўқлиги учун ҳозирда қандай қилиб ташкиллаштириш бўйича бош қотираяпмиз. Балким, тренерларимизни ҳудудларга чиқариб ўқитишимиз ҳам мумкин. Лекин унда биз мақсадимизга эриша олмаймиз. Чунки, уларни жойидан қўзғатиб пойтахтда ўқитадиган бўлсак, ўзларига кераклик билимларни эгаллашади. Жорий йилнинг март ойида фақат марказий идоралар матбуот котибларини ўқитдик, холос. Бу Сардоба воқеасини ҳамда карантиндаги вазиятни ёритишда жуда асқатди»,— деди Дилшод Саиджонов.
Изоҳ (0)