Андижонда вояга етмаган бола Nexia ҳайдаб кетаётгани аниқланди ва унга бошқарувни топширганлиги учун автомобиль эгасига нисбатан белгиланган тартибда чора кўрилди. Бу ҳақда ЙҲХББ матбуот хизмати хабар берди.
Маълум бўлишича, 5 октябрь куни Андижон вилояти, Андижон шаҳар ИИБ ЙҲХБ ЙПХ ходими белгиланган тақсимот асосида Андижон шаҳар, бешинчи кичик даҳа ҳудудида хизмат олиб бораётган вақтида хизмат жойига яқин бўлган 41-сонли мактабга кўринишидан вояга етмаган бола Нексия-3’ни бошқариб келганлигини кўрган ва дарҳол унинг ёнига борган.
Вояга етмаган боладан ёшини сўраган вақтида бола ушбу 41-сонли мактабнинг 5-синфида таҳсил олишини маълум қилган.
ЙПХ ходими бола билан мактабга кириб, мактаб раҳбари, ўқитувчилар, ўқувчилар ва боланинг оила аъзоси иштирокида аниқланган ҳолатни муҳокама этган.
Транспорт воситасини бошқариш ҳуқуқига эга бўлмаган, вояга етмаган болага бошқарувни топширганлиги учун автомобиль эгасига нисбатан белгиланган тартибда чора кўрилган.
Изоҳ (0)