Швеция ва Норвегияда 5 октябрь куни Нобель ҳафталиги бошланди, ҳафталик давомида ушбу нуфузли мукофотнинг 2020 йилдаги совриндорлари аниқланади. Бу ҳақда «Интерфакс» хабар бермоқда.
Стокгольмдаги Нобель қўмитаси 5 октябрь, душанба куни мукофотнинг тиббиёт бўйича, сешанба куни — физика, чоршанба куни — кимё, пайшанба куни эса адабиёт бўйича совриндорларини эълон қилади.
Дунёдаги энг нуфузлилардан бири ҳисобланадиган дунёда тинчлик ўрнатишга ҳисса қўшганлик учун мукофот совриндори, анъанага кўра, Ослода эълон қилинади. Маросим 9 октябрь, жума кунига белгиланган. Нобель қўмитаси маълумотларига кўра, бу йил тинчлик мукофотига 318 нафар номзод даъвогарлик қилмоқда, улардан 211 нафари — жисмоний шахс бўлса, 107 таси — ташкилотлардир.
Нобель қўмитаси қоидаларига кўра, мукофот олишга потенциал номзодлар рўйхати сир сақланади.
Аммо қатор ОАВлар йил давомида тинчлик мукофотига баъзи машҳур президент ва сиёсатчилар илгари сурилгани ҳақида хабар берган эди. Аввалроқ Россия президенти Владимир Путин тинчлик бўйича Нобель мукофотига номзод қилиб кўрсатилгани, мукофот қўмитасига рус ёзувчиси Сергей Комков ариза юборгани айтилган эди.
19 сентябрь куни эса россиялик олим, Нью-Жерсидаги Ратгерс университети профессори Сергей Ерофеев сиёсатчи Алексей Навальний Нобель мукофотига номзод қилиб кўрсатилганини маълум қилганди.
Аввалроқ норвегиялик депутат, кейинроқ Швеция парламенти аъзоси Дональд Трампга тинчлик бўйича Нобель мукофоти беришни таклиф қилганди.
Маълумот учун, Нобель фондининг Директорлар кенгаши 2020 йилдан бошлаб Нобель мукофоти миқдорини 1 миллион швед кронасига (тахминан 110 минг АҚШ доллари) оширишга қарор қилди. COVID-19 эпидемияси туфайли 2020 йилда мукофотни топшириш анъанавий маросими ўтказилмайди.
Изоҳ (0)