Ўзбекистон бош вазир ўринбосари, ЮНЕСКО масалалари бўйича миллий комиссия раиси Азиз Абдуҳакимов 28 сентябрь куни ЮНЕСКО бош директори Одри Азуле билан Халқаро ахборотдан эркин умумфойдаланиш кунини нишонлашга бағишланган юқори даражали онлайн муҳокамада иштирок этди. Бу ҳақда Туризмни ривожлантириш давлат қўмитаси хабар берди.
Маълум қилинишича, тадбир 28—29 сентябрь кунлари Жаҳон соғлиқни сақлаш ташкилоти, Халқаро архивлар кенгаши, БМТ Тараққиёт дастури, Twitter ижтимоий тармоғи, «Очиқ ҳукумат» ҳамкорлиги ташаббуси, Transparency International илмий-ишлаб чиқариш бирлашмаси каби етакчи ташкилот ва тузилмаларнинг раҳбарияти иштирокида ўтказилмоқда.
Таъкидланишича, Ўзбекистон бу каби нуфузли форумга таклиф қилинган ягона мамлакат ҳисобланади.
Ахборотнинг COVID-19 пандемиясига қарши курашишдаги муҳим ролини инобатга олиб, тадбир учун «Ахборот олиш — ҳаётларни қутқариб, ишончни мустаҳкамлаб, умид бағишлаб» мавзуси танланган. Маърузачилар пандемия шароитида жамиятни ахборот билан таъминлашнинг турли жиҳатларини халқаро тузилмалар, давлат ва нодавлат ташкилотлар, шунингдек, хусусий сектор нуқтаи назаридан ёритди.
Азиз Абдуҳакимов Ўзбекистонда Президент Шавкат Мирзиёев бошчилигида ОАВни ривожлантириш бўйича амалга оширилаётган кенг кўламли ислоҳотларга оид тақдимот ўтказди. Ўзбекистонда ОАВни либераллаштириш ва уларнинг жамиятдаги ролини мустаҳкамлаш, сўз эркинлиги ва журналистлар ҳуқуқларини тарғиб қилиш, ҳукумат фаолияти очиқлиги ва шаффофлигини таъминлаш, давлат ташкилотлари ҳамда аҳоли ўртасидаги мулоқотни мустаҳкамлаш йўлида қилинган ишлар аниқ мисоллар билан ёритиб берилди. Мамлакатда олиб борилаётган ислоҳотлар меваси ўлароқ, жамият ҳаётида ижтимоий-сиёсий фаол қатламнинг пайдо бўлаётгани, кучли фуқаролик жамияти сари илдам қадамлар қўйилаётганига алоҳида урғу берди.
Қўмита хабарида айтилишича, юқори даражали онлайн муҳокама давомида Ўзбекистон ҳукуматининг ЮНЕСКО билан ҳамкорликдаги Халқаро ахборотдан эркин умумфойдаланиш куни бўйича халқаро анжуманини 2021 йилнинг кузида Тошкент шаҳрида ўтказиш истаги билдирилди.
Қайд этилишича, ушбу тадбирни Ўзбекистонда ташкил қилишга доир келишувга Ахборот ва оммавий коммуникациялар агентлиги раҳбариятининг ЮНЕСКО бош директори Одри Азуле билан 2020 йилнинг 9 январида Париж шаҳрида бўлиб ўтган учрашуви давомида эришилган.
Бош вазир ўринбосари кейинги йилга режалаштирилган ушбу анжуман давлатларда юз бериши мумкин бўлган ахборий инқирозлар ва муаммоларнинг олдини олиш ва уларга қарши курашиш йўлида ЮНЕСКО ҳамда бошқа халқаро ташкилотлар билан ҳамкорликни янада мустаҳкамлаш йўлида хизмат қилишини таъкидлади.
ЮНЕСКО бош директори Одри Азуле ва тадбирнинг бошқа иштирокчилари Ўзбекистон ҳукуматига келгуси йилда бу қадар муҳим тадбирни ўтказишга тайёр эканлиги учун самимий миннатдорлик билдирди.
Аввалроқ Миллий масс-медиани қўллаб-қувватлаш ва ривожлантириш жамоат фонди ЕХҲТнинг Ўзбекистондаги лойиҳалари координатори билан биргаликда ахборотдан умумфойдаланишга бағишланган халқаро онлайн конференция ташкил қилиши ҳақида хабар берилганди.
Изоҳ (0)