Футбол бўйича Coca-Cola Суперлига 17-туридан ўрин олган икки ўйин 25 сентябрь, жума куни бўлиб ўтди.
«Локомотив» жамоаси «Металлург» меҳмони бўлди. Учрашувнинг 37-дақиқасида Кахи Махарадзе «темир йўлчилар»ни олдинга олиб чиқди. Иккинчи бўлим дебютида Ихтиёр Тошпўлатов ҳисобни тенглаштиришга эришди.
66-дақиқада Темурхўжа Абдухолиқов меҳмонларнинг иккинчи голини урди. Учрашув якунланиши арафасида Шаҳзод Убайдуллаев мувозанатни тиклади.
«Металлург» 29 очко билан 5-ўринда бормоқда, «Локомотив» ҳисобида эса 22 очко бор ва жамоа 7-поғонадан жой олган.
Параллел баҳсда мусобақа аутсайдерлари «Андижон» ва «Бухоро» ўзаро куч синашди. Дастлаб меҳмонлар 30-дақиқада Иззат Абдуллаевнинг голидан кейин олдинга ўтиб олди. Бунга майдон эгалари беш дақиқа ўтиб, Абдулло Олимовнинг голи билан жавоб қайтарди.
Биринчи бўлим охирлаб бораётган бир вақтда бухороликлар футболчиси Илҳом Алижонов иккинчи сариқ карточкасини олиб майдонни тарк этди. Иккинчи бўлимда андижонликлар устунликка эга бўлди. 52-дақиқада Бахтиёр Қосимов «Андижон»га ғалаба келтирган голга муаллиф бўлди. Ҳисоб янада йириклашиши мумкин эди, бироқ мезбонлар 85-дақиқада пенальтидан унумли фойдалана олмади.
Шу тариқа «Андижон» 2020 йилги мавсумдаги илк ғалабасини қўлга киритди ва очколарини 10 тага етказиб олган ҳолда 12-ўринга кўтарилди. «Бухоро» (8) эса сўнгги поғонага равона бўлди.
Coca-Cola Суперлига
17-тур баҳслари
25 сентябрь, жума
«Металлург» — «Локомотив» 2:2
Голлар: 0:1 – 37 Кахи Махарадзе, 1:1 – 52 Ихтиёр Тошпўлатов, 1:2 – 66 Темурхўжа Абдухолиқов, 2:2 – 86 Шаҳзод Убайдуллаев.«Металлург»: Александр Лобанов, Аббос Отахонов, Дониёр Нарзуллаев (Абдураҳмон Абдулҳақов 64), Саламат Қутибоев, Шаҳзод Убайдуллаев, Аброр Тошқўзиев, Зоҳид Абдуллаев (Мурод Бобожонов 64), Ихтиёр Тошпўлатов, Станислав Андреев, Даврон Анваров (Худойшукур Сатторов 46), Евгений Чумак.
«Локомотив»: Жавоҳир Илёсов, Жаҳонгир Абдумўминов (Жавоҳир Алижонов 80), Кахи Махарадзе (Савелий Абрамов, 86), Марат Бикмаев (Абдулазиз Юсупов 80), Темурхўжа Абдухолиқов, Азизбек Амонов (Шоҳжаҳон Қиличев 60), Ғулом Ҳайдар Ғуломов, Дилшоджон Комилов, Шерзод Файзиев, Жалолиддин Жумабоев, Диёржон Туропов (Авазбек Ўлмасалиев 80).
«Андижон» — «Бухоро» 2:1
Голлар: 0:1 – 30 Иззатилла Абдуллаев, 1:1 – 35 Абдулло Олимов, 2:1 – 52 Бахтиёржон Қосимов.«Андижон»: Элдор Адҳамов, Азамат Исроилов, Фарҳод Мираҳматов, Бахтиёр Қосимов, Фарҳодбек Бекмуротов, Сирож Мелиев, Абдулло Олимов, Усмонали Усмоналиев, Муҳаммад Йўлдошев (Қаҳрамон Баҳодиров, 90), Дониёр Абдуманнопов (Асилбек Азизов, 90+2), Нодир Мавлонов (Жамшид Ҳомидов, 46).
«Бухоро»: Зафар Сафаев (Сардор Қобулжонов, 61), Миржалол Жумаев, Бобуржон Аманов, Жасур Ҳакимов, Азиз Ибрагимов (Бекзод Саидов, 51), Беҳруз Садиллоев (Зоҳир Пиримов, 61), Аброр Хусинов, Эргаш Исмоилов, Илҳом Алижонов, Изатилла Абдуллаев (76.Абдуғани Камолов, 46), Максимилиан Фомин.
Огоҳлантиришлар: Алижонов (34), Мавлонов (42), Қобулжонов (80).
Четлатиш: Алижонов (41).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)