21 сентябрь куни Ўзбекистон бош вазири ўринбосари — инвестициялар ва ташқи савдо вазири Сардор Умурзоқов раислигида ташқи савдони тариф ва нотариф тартибга солиш кенгашининг навбатдаги йиғилиши бўлиб ўтди. Бу ҳақда Инвестициялар ва ташқи савдо вазирлигининг матбуот хизмати хабар берган.
Йиғилишда тўқимачилик саноатида қўлланиладиган технологик ускуналар ва бутловчи қисмларга солинадиган импорт божхона тўловлари ставкаларини камайтириш масалалари муҳокама қилинди.
Шунингдек, алоҳида маҳсулот позициялари учун утилизация йиғимини нолга тенглаштириш истиқболлари ўрганилиб, бир қатор маҳсулот турлари (айнан қайси турлар экани айтилмаган) учун импорт божхона тўловларининг ўзгаришига оид хўжалик юритувчи субъектларнинг мурожаатлари кўриб чиқилди.
«Gazeta.uz»нинг ёзишича, йиғилишда юк машиналари, қуюлтирилган сут, алкилбензол ва соя оқсили изолатлари импорт божларини ўзгартириш (пасайтириш) масалалари ҳақида ҳам гап борган.
Шу билан бирга, бутловчи буюмлар, шу жумладан, йиғув ишлаб чиқаришга мўлжалланган буюмларга ТИФ ТН кодларини таснифлашни янада такомиллаштириш, маҳсулот ва ишлаб чиқариш жараёнларининг техник жиҳатдан тартибга солиниши ва техник регламентларини халқаро стандартларга мувофиқ такомиллаштириш бўйича самарали чора-тадбирлар қабул қилишга эътибор қаратилиши лозимлиги қайд этилган.
Йиғилиш якунларига кўра, кенгаш котибиятига вазифаси ташқи иқтисодий фаолият соҳасида тезкор қарорлар қабул қилишнинг янада мослашувчан механизмларидан фойдаланишни назарда тутувчи ташқи савдони тартибга солишда мутлақо янги тизимни жорий этиш бўйича таклифларни ишлаб чиқиш бўлган ишчи гуруҳ тузиш топширилган.
Изоҳ (0)