Россия Ташқи ишлар вазирлиги Туркманистон Ташқи ишлар вазирлигига мамлакатда рус тили синфларининг ёпилиши билан боғлиқ вазиятни тушунтиришни сўраб нота юборди. Бу ҳақда «Хроника Туркменистана» хабар берди.
Россия Ташқи ишлар вазирлиги томонидан маълум қилинишича, нота янги ўқув йили арафасида Ашхободда рус тилида таълим бериладиган синфлар «санитария-гигиена меъёрларига амал қилиш зарурати» сабабли ёпилгани муносабати билан юборилган. Россиянинг Ашхободдаги элчихонаси Туркманистон томонига бу масала бўйича тушунтириш сўраб мурожаат қилган, бироқ мурожаатга жавоб олинмаган.
«Ушбу муаммо бўйича бизга қилинган мурожаатлар ва жамоатчиликнинг мавжуд вазиятдан хавотирланиши муносабати билан биз Туркманистон томони икки мамлакат ўртасидаги анъанавий дўстона муносабатлар руҳида мамлакатда рус тилидаги таълим соҳасининг қисқаришига йўл қўймаслигига умид қиламиз», — дейилади Россия ТИВ баёнотида.
Нашрнинг ёзишича, 30 август куни Ашхабоддаги 64-ихтисослаштирилган ўрта мактаб ҳовлисида рус тилида таълим берадиган бўлимнинг ўқувчилари ва уларнинг ота-оналари норозилик намойишини ўтказган. Бунга янги ўқув йили арафасида мактабнинг рус тилида таълим берадиган бўлимининг ёпилгани, ўқитувчиларнинг ишдан бўшатилгани ва ўқувчиларнинг тарқатиб юборилгани сабаб бўлган.
Таъкидланишича, мактабга пора бермасдан кириш имконсиз эди, поранинг миқдори 1000-2000 долларни ташкил этган. Унинг собиқ директори Бяшим Гаитназаров мактабга керакли миқдордаги пул олиб келганларнинг ҳаммасини қабул қилган, натижада таълим муассасаси ҳаддан ташқари тўлиб кетган эди. Кейинчалик директор ҳибсга олинган ва тергов изоляторига жойлаштирилган, директор у ерда ўз жонига қасд қилган.