Россия Ташқи ишлар вазирлигининг Хориждаги ватандошлар билан ишлаш департаменти бошлиғи Олег Мальгинов Россиянинг Ўзбекистондаги элчиси лавозимига тайинланади. Бу ҳақда Россия давлат думасидаги манбасига таяниб, «Sputnik.tj» хабар берди.
«Олег Мальгиновни Ўзбекистондаги элчимиз этиб тайинлаймиз. У ҳозирда Ташқи ишлар вазирлигининг Хориждаги ватандошлар билан ишлаш департаменти бошлиғи бўлиб ишламоқда. Энди у Ўзбекистонга жўнайди», дейилади хабарда.
Манбанинг таъкидлашича, Мальгинов номзоди тасдиқланган.
Маълумотларга кўра, Мальгинов дипломатия соҳасида 1979 йилдан бери фаолият юритиб келади. 1979—1983 йиллар давомида собиқ иттифоқнинг Ҳиндистондаги элчихонасида ишлаган. 1993 йилгача эса аввал Собиқ иттифоқ, кейинчалик эса Россия Ташқи ишлар вазирлигининг Инсон ҳуқуқлари департаменти раҳбари ўринбосари лавозимини эгаллаган.
Мальгинов 1994—1999 йилларда Россиянинг БМТдаги ва Женевадаги бошқа халқаро ташкилотлардаги доимий ваколатхонаси етакчи маслаҳатчиси, кейинчалик эса Россия Ташқи ишлар вазирлигининг Халқаро инсонпарварлик ҳамкорлиги ва инсон ҳуқуқлари департаменти директори ўринбосари сифатида фаолият юритган.
Дипломат 2003 йилдан 2006 йилгача Россиянинг Бангладешдаги элчиси, 2011—2016 йилларда эса Руминиядаги элчиси лавозимларини эгаллаган.
Маълумот учун, айни вақтда Россиянинг Ўзбекистондаги элчиси лавозимини 2009 йил ноябрдан бери Владимир Тюрденев эгаллаб келмоқда.
Эслатиб ўтамиз, 2018 йилда Ботиржон Асадов Ўзбекистоннинг Россиядаги элчиси этиб тайинланганди. Ботиржон Асадов ташқи ишлар вазири Абдулазиз Комиловнинг биринчи ўринбосари сифатида фаолият юритиб келаётганди. У турли йилларда Ўзбекистоннинг Жанубий Кореядаги элчиси, Савдо-саноат палатаси раиси ўринбосари вазифаларида ишлаган.
Изоҳ (0)