Фарғона вилояти Марғилон шаҳар тиббиёт бирлашмаси бошлиғи Авазбек Мадаминович Ғаниев 15 сентябрь куни вафот этди. Бу ҳақда Facebook’да хабар қолдирган вилоят ҳокимлиги ахборот хизмати раҳбари Муҳаммаджон Обидовнинг ёзишича, Ғаниев қон босими кўтарилиши ва мияга қон қуйилиши оқибатида вафот этган. У 62 ёшда эди.
Аввалроқ вилоят Соғлиқни сақлаш бошқармаси ва Фарғона вилояти Санитария-эпидемиологик осойишталик маркази Авазбек Ғаниевнинг коронавирусга чалингани ҳақидаги хабарларни рад этган, вилоят ҳокимлиги ахборот хизмати эса унинг пневмония хасталиги ва юқумсиз бўлган бошқа ҳамроҳ касалликлар билан Марғилон шаҳар тиббиёт бирлашмаси шифохонасида даволанаётганини маълум қилганди.
Авазбек Мадаминович Ғаниев Олий Мажлис Қонунчилик палатаси депутати Дониёр Ғаниевнинг отаси, Фарғона вилояти ҳокими Шуҳрат Ғаниевнинг акаси эди.
Аввалроқ Андижон вилояти Андижон тумани тиббиёт бирлашмаси бошлиғи, Қашқадарё вилояти Чироқчи тумани тиббиёт бирлашмаси бош шифокори, Қашқадарё вилоят Соғлиқни сақлаш бошқармаси бошлиғи ўринбосари коронавирус инфекцияси асоратлари оқибатида вафот этгани ҳақида хабар берилган.
Изоҳ (0)