Самарқандда юк поезди қулоқчин таққан йигитни уриб кетмаслик учун фавқулодда тўхташни амалга оширди

6 сентябрь куни соат 06:43 ларда Мароқанд—Тинчлик йўналишидаги юк поезди Каттақўрғон—Зирабулоқ темир йўл бекатларининг 4-пикетида ҳаракатланиб кетаётганида фавқулодда тўхташни амалга оширади. Бу ҳақда Самарқанд вилояти ИИБ Транспортда хавфсизликни таъминлаш бошқармаси ҳуқуқбузарликлар профилактикаси бўлими ахборотига таяниб, «Kun.uz» хабар қилди.

Хабарга кўра Каттақўрғон шаҳридаги маҳаллардан бирида яшовчи 2003 йилда туғилган Р.Ф. темир йўл излари ичида қулоқчин тақиб кетаётганида орқа томондан келаётган юк поездининг сигнал беришини эшитмаган.

Поезд 17 ёшли йигитни уриб юбормаслик учун фавқулодда тормоз бериб, қийинчилик билан тўхтаган. Қайд этилишича, поезд 15 дақиқадан сўнг ўз йўналиши бўйича ҳаракатни давом эттирган.

Ҳолат маҳалла ва таълим муассасасида муҳокама этилиб, суриштирув ишлари олиб борилмоқда.

Андижон вилоятининг Избоскан туманида 2018 йил 18 июлда вояга етмаган ўсмир билан боғлиқ фожиа юз бергани, туман ҳудудида поезд темир йўл релсида ўтирган болани босиб ўтиб кетгани, 2018 йил 5 ноябрда Фарғона вилоятининг Ўзбекистон туманида яшовчи Н. С. қулоғида қулоқчин билан темир йўлни кесиб ўтаётганида поезд уриб юборгани хабар қилинганди.

2019 йилда ҳам поезднинг одам уриб юбориши билан боғлиқ ҳодисалар содир бўлган. Хусусан, 2019 йил 1 январь куни соат тахминан 18:40 атрофида Жомбой—Булунғур темир йўл бекатлари оралиғида «Афросиёб» тезюрар поезди 39 ёшли аёлни уриб юборган. Шу йили март ойида Тошкент вилоятининг Қибрай туманидан ўтувчи «Қодрия—Оққовоқ» темир йўл бекатлари оралиғининг 16-километрида юк поезди Қибрай қишлоғининг Бирлик кўчасида яшаган М.М.ни эҳтиётсизлиги сабаб уриб кетган. Бухорода 2019 йил 5 декабрь куни электровоз темир йўлни кесиб ўтаётган пиёда 58 ёшли Г.Х.ни уриб юборган ва у ҳодиса жойида вафот этган.

2020 йили январь ойида Самарқанд вилоятида поезд уриб кетиши оқибатида уч киши, жумладан 8-синф ўқувчиси ҳалок бўлган. Шунингдек, 2020 йил 10 январь куни соат тахминан 12:25 да юк поезди 20 та вагони билан бирга Ғунча шаҳарчасидан ўтувчи «Чортоқ—Наманган» бекатлари оралиғидаги 96-километр 2-пикетида кетаётган вақтида, темир йўлни кесиб ўтаётган 2-гуруҳ ногирони (кар-соқов) 31 ёшли З.Я.ни уриб юборган.