Бухоро вилоятида ноқонуний овланган 79 дона балиқ «Бухоро гўшт сут савдо» МЧЖга топширилди. Бу ҳақда «Дарё»га вилоят Экология ва атроф-муҳитни муҳофаза қилиш бошқармаси ахборот хизмати хабар берди.
Таъкидланишича, Бухоро вилояти Экология ва атроф-муҳитни муҳофаза қилиш бошқармаси Экологик назорат инспекцияси ходимлари томонидан Пешку туманидаги Қорақир табиий сув ҳавзасида тезкор рейд ўтказилган. Рейд давомида мазкур ҳавзанинг иккинчи контурида шу туманда яшовчи фуқаро Т.Б. ноқонуний балиқ овлаётгани маълум бўлган ҳамда инспекция ходимлари томонидан тўхтатилган.
«Фуқаро Т.Б.дан 54 дона лаққа, 23 дона зоғора ва 2 дона Ўзбекистон Қизил китобига киритилган Туркистон мўйловдори, жами 79 дона балиқ ашёвий далил сифатида мусодара қилиб олинди ҳамда «Бухоро гўшт сут савдо» МЧЖнинг музлаткичига топширилди, — дейди вилояти Экология ва атроф-муҳитни муҳофаза қилиш бошқармаси ахборот хизмати раҳбари Жаҳонгир Наврўзов. — Шунингдек, фуқародан 1 дона резина қайиқ, 2 дона аккумулятор батареяси, 1 дона қўлбола кучли ёритувчи чироқ ҳам тегишли тартибда расмийлаштириб олиб қўйилди».
Аниқлик киритилишича, фуқаро ушбу ҳаракати билан табиатга 32 миллион 335 минг сўм зарар етказган. Иш юзасидан йиғилган ҳужжатлар Бухоро вилоят прокуратурасига юборилган.
Изоҳ (0)