Европадаги ўзбекистонликлар Франкфурт—Тошкент йўналишида чартер рейси билан олиб келинди
Республика махсус комиссияси қарори билан Европа давлатларида вақтинча бўлиб турган ва COVID-19 туфайли Ўзбекистонга қайтиб кетолмаганларни олиб келиш мақсадида Тошкент–Франкфурт Майн – Тошкент йўналишида навбатдаги чартер рейс ташкил этилди. Бу ҳақда «Дунё» агентлиги хабар берган.
Uzbekistan Airways авиакомпанияси самолёти бортидан Германия, Швеция, Швейцария, Чехия, Буюк Британия, Испания, Италия, Норвегия ва Бельгия давлатларидан 172 нафар йўловчи, жумладан, ўзбекистонлик талабалар, сайёҳ сифатида келганлар, қариндошларининг уйларида вақтинча бўлиб турганлар, шунингдек, Ўзбекистондаги турли ишлаб чиқариш корхоналарининг хорижий мутахассислари жой олган.
Бундан аввал Франкфурт Майн–Тошкент йўналишида 370 нафар ўзбекистонлик махсус рейсда ватанга қайтарилганди.
«Ўзбекистонда Германия «сариқ зона» ҳудудга киритилганини инобатга олиб карантин вақтини ҳам ўз уйимизда ўтказишмиз ҳақидаги хабар бизни янада қувонтирмоқда.
Мен қатори Европанинг кўпгина давлатларида қолиб кетган юртдошларимиз учун Ватанга қайтишга имконият яратиб берилди», – деган чартер рейсда Ўзбекистонга қайтаётган талаба Исмоил Жўраев.
Аввалроқ Ўзбекистон фуқароларини ватанига қайтариш мақсадида Uzbekistan Airways АЖ томонидан 2020 йил 31 август куни Тошкент—Владивосток—Тошкент йўналиши бўйича қўшимча чартер репатриация қатнови амалга оширилиши хабар қилинганди.
