Франциянинг Дордонь водийсида маҳаллий фуқаролардан бири умри давомида йиғган эски автомобиллар коллекцияси жиноятчилар гуруҳи томонидан ўғирлаб кетилди, деб хабар беради Motor.
Коллекция эгаси 2019 йилда вафот этган, унинг ўғли эса яқинда машиналар йўқолганини пайқаб қолган: гараждан тўртта ретро-кар йўқолган, хусусан, улар орасида 99 нусхада яратилган қизил Lancia Flamina Zagato ҳам бор. Экспертларнинг баҳолашича, Lancia’ни 400 минг евродан ортиқроққа сотиш мумкин.
Афтидан ўғрилик бир ой олдин содир этилган. Гараждан Lancia Flamina Zagato’дан ташқари оқ Alfa Romeo Spider, Facel Vega купеси ва модели кўрсатилмаган Pontiac ўғирланган. Бундан ташқари, улар автомобилларнинг алоҳида сақланган оригинал деталларини ҳам ўзлари билан олиб кетган. Полициянинг тахминича, жиноятчилар аввал бошидан нарсаларнинг қаерда турганидан бохабар бўлган. Ўғирланмаган ягона автомобиль — узоқ йиллар давомида ер билан бирлашиб кетаётган Cadillac.
Маҳаллий полиция бошқа автомобиль коллекционерлари ва автоклубларни ўғирланган ретро-карлар ва оригинал деталлар аукционда кутилмаганда «пайдо бўлиб» қолишидан огоҳлантирган.
Изоҳ (0)