Расман: Лионель Месси «Барселона»ни тарк этишга қарор қилганини маълум қилди. Бартомеу фавқулодда йиғилиш чақирди

«Барселона» ҳужумчиси Лионель Месси каталонлар сафини тарк этишга қарор қилди.

Marca’нинг хабар қилишича, аргентиналик футболчи «Барселона» раҳбариятига жамоани тарк этиш қарорига келганини факс орқали маълум қилган. Таъкидланишича, футболчи шартномада кўрсатилган келишувни бирёқлама бекор қилиш бандидан фойдаланмоқчи.

Қайд этилишича, ушбу банд 2020 йилнинг 10 июнида ўз кучини йўқотган, бироқ коронавирус туфайли юзага келган ноодатий вазият сабаб ўйинчи ўзини бу имкониятдан кечроқ бўлса-да фойдаланиш ҳуқуқига эга деб ҳисобламоқда.

Ўз навбатида «Барселона» ушбу факсни олганини тасдиқлади ва унга жавоб йўлланганини ҳам маълум қилди, дея хабар қилмоқда Diario Sport. «Барселона»дагиларнинг қайд этишича, шартномани бир томонлама бекор қилишга Мессининг ҳаққи йўқ.

Маълум бўлишича, шартномага кўра Месси кетиш ҳақидаги қарорини 30 майга қадар маълум қилиши керак бўлган, бироқ футболчи бу ишни қилмаган. Шунингдек, «Барселона» Мессининг очиқдан-очиқ норозилигига қарамай вазият назорат остида эканини маълум қилган. Клуб уни шартномада кўрсатилган 700 миллион евро товон пули эвазигагина қўйиб юборади.

Сўнгги хабарларга кўра, «Барселона» президенти Мессининг қарори юзасидан фавқулодда йиғилиш чақирган. Директорлар иштирокидаги мажлис «Камп Ноу»да бўлиб ўтади. Унда раҳбарият мазкур вазиятдан чиқиш ва Мессини жамоадаги келажаги масаласини кўриб чиқади.