Икки нафар яҳудий бола Исроил марказида 425 дона олтин тангадан иборат қадимий хазинани топиб олди. Умумий оғирлиги 845 грамм бўлган хазина соф олтиндан иборат, деб хабар беради CNN.
Хазинага дуч келган ўсмирлар дастлаб жуда юпқа баргларни топиб олдик деб ўйлаган.
Тангалар сопол идиш ичида бўлган. Тангаларнинг барчаси 24 қиротли соф олтиндан ясалган.
Олтин тангалар эрамизнинг IX асрига — минтақа Аббосийлар ҳукмронлиги остида бўлган даврга тегишли. Аббосийлар бир неча аср давомида ҳозирги замонавий Жазоирдан Афғонистонгача бўлган ҳудудни назорат қилган. Археологларнинг сўзларига кўра, бу каби маблағга ўша вақтда ҳашаматли уй сотиб олиш мумкин бўлган. Шунингдек, уларнинг қўшимча қилишича, тангаларнинг барчаси идеал ҳолатда сақланган.
«Ушбу хазинани кўмиб қўйган инсон уни қайта топишни ўйлаган ва ҳатто идиш қимирламаслиги учун уни мих билан қоқиб қўйган. Биз унинг хазина олдига нима сабабдан қайтиб келмаганини фақат тахмин қила оламиз», — дейди мутахассислар.
Изоҳ (0)