Мексика киноижодкорлари томонидан тақдим қилинган «Ёлғон асираси» кўп қисмли сериали ўзига хос сюжети, актёрлар ижроси сабаб миллионлаб мухлислар қалбидан жой олган. «Яндекс Дзен» мазкур сериалда бош ролларни ижро қилган актёрлар ҳақида маълумотлар билан бўлишади.
«Ёлғон асираси», АҚШда ўз жанри бўйича энг юқори рейтингни қайд қилган бўлиб, Америка телевидениеси тарихида энг кўп кўрилган теленовелла деб топилган.
Габриэла Спаник
Венесуэлалик актриса ва қўшиқчи Габриэла Спаник сериалда эгизак опа-сингиллар ролини ижро қилган. 1991 йилда кичик ролларни ижро қилган Габриэлага 1992 йилда омад кулиб боқади. Шу йили ўтказилган Венесула гўзали танловида биринчиликни қўлга киритади ва 1997 йилга қадар турли теленовеллаларда суратга тушади.
1999 йилда Мексиканинг «Телевиса» телекомпанияси билан шартнома тузади ва унга биноан «Ёлғон асираси»да бош ролни ижро қилади. Фильм муваффақиятидан кейин «Телевиса»нинг бошқа лойиҳаларида ҳам иштирок этади. 2005 йилда мусиқий карьерасини бошлайди ва илк альбомини тақдим қилади. Қўшиқчилик ва актрисаликдан ташқари Warner Брос. фитнесс дастурини ҳам олиб боради. Габриэланинг, Даниэла исмли эгиз синглиси бор ва у актриса ҳамда моделлик фаолияти билан шуғулланган.
Актриса 1995 йил Актор Мигел де Леонга турмушга чиққан ва 2002 йилда ажрашган. Бунга фарзандининг отаси унга қўл кўтаргани сабаб бўлган. 47 ёшга тўладиган актриса карьераси давомида 23 марта кинода суратга тушиб улгурган.
Фернандо Колунга
Сериалда ўзининг келишган ташқи кўриниши билан эсда қолган актёр Фернандо Колунганинг асл касби муҳандис, лекин ушбу соҳада бирон марта ҳам фаолият олиб бормаган. Унинг санъат оламига кириб қолишига, театрдаги кастингда иштирок этгани ва қабул қилингани сабаб бўлган. Шундан кейин Колунга «Телевиса» қошидаги актёрлик маҳорат мактабига қатнай бошлайди. Сериалда суратга тушгунига қадар у театрда роль ижро қилган. Кино ва сериаллардаги фаолияти эса «Ширин истак» фильмида дублёр сифатида роль ижро қилганидан кейин бошланган. Аммо унга омад «Ҳақиқий севги» сериалида Адела Норего билан жуфтлик ролини гавдалантиргани сабаб бўлган. Шундан кейин ҳар икки бош қаҳрамон ижрочиси энг яхши актёр ва актриса номинацияси бўйича мукофотни қўлга киритишга муваффақ бўлган.
Ҳали оила қурмаган Фернандо, айни вақтда актриса Лусеро билан учрашади. 2020 йилда 54 ёшни қаршилаган актёр ижро қилган роллари арсеналида 29 кинофильмни кўриш мумкин.
Доминика Палета
Сериалда бош қаҳрамонга турмушга чиқиш ниятида бўлган Хемани гавдалантирган актриса Доминика Палетанинг «Ёлғон асираси»даги роли унга муваффақият олиб келган. Актриса 2000 йилда актёр Фабиан Ибарра билан турмуш қурган ва икки қиз фарзандини дунёга келтирган. Санъат тарихи бўйича таҳсил олган Доминика учта тилда сўзлаша олади. 2020 йилда 48 ёшни қаршилайдиган актриса, 29 та сериалда суратга тушган.
Хуан Пабло Гамбоа
Илк бор 1992 йилда «Мариэлена» теленовелласида суратга тушган, колумбиялик актёр Хуан Пабло Гамбоа, хонанда сифатида ҳам яхши маълум. У 1994 йилда Мехикога кўчиб келган ва шу йили фильмда суратга тушишни бошлаган. Актёрнинг куйлаган қўшиқларидан сериалларда ҳам фойдаланилади.
40 дан ортиқ сериалда суратга тушган актёр бу йили 54 ёшга тўлади.
Изоҳ (0)