Яқин орада ҳаётимизда ҳеч қайси байрамни 15 августни кутгандек кутмаган бўлсак керак. Чунки бу куни карантин юмшатилди. Энди бемалолчилик, буёғи Фарғона тонг отгунча деганлар адашади. Чунки бу карантин бекор қилинди, дегани эмас.
Келинг, орзиқиб кутилган 15 августдан бошлаб қандай енгилликлар юзага келганини эслайлик.
Шу кундан шахсий ва жамоат транспорти ҳаракати, жумладан, метро ҳам, қатор фаолият турлари, бозорлар тикланди. Белгиланган талабларга амал қилган ҳолда уйда 30 кишилик оилавий маросимлар ўтказиш мумкин бўлди. Маҳаллий авиа ва темир йўл қатнови учун рухсат берилди. Нодавлат мактабгача таълим ташкилотлари ва мактаблар, шунингдек, ўқув курслари (марказлари) фаолиятига рухсат берилди. Бунда ушбу муассасалар муайян санитария талабларига бўйсунишлари лозим. Шунингдек, санаторийлар, пансионатлар, болалар оромгоҳлари, меҳмонхоналар, меҳмон уйлари, пляжлар, хостеллар, ижарага бериладиган дала ҳовлилар ва бошқа дам олиш масканлари фаолиятига рухсат берилди. Бунда муайян санитария талабларига риоя этиш талаб қилинади. Масалан, фуқаролар алоҳида, бир-биридан ажратилган ҳолда (ҳар бир оилага бир хона талабига риоя этган ҳолда) жойлаштирилади.
17 августдан бошлаб диний ташкилотлар фаолиятига рухсат берилади. Бунда ҳар куни дезинфекция ишларини амалга ошириш ҳамда қатъий ижтимоий масофани сақлаш чекловларига риоя этилиши таъминланиши лозим.
20 августдан буюм ва қурилиш маҳсулотлари бозорлари, йирик савдо дўконлари, спорт заллари, фитнес клублари ва бассейнлар ишлай бошлайди. Тўғри, айрим вилоятлар бу борада олдинлаб кетиб, буюм бозорларини очиб юборган.
Хўш, мактабларчи? Мактабни очиш бўйича учта вариант кўриб чиқиляпти. 1-вариантга кўра, мактаблар ҳар йилгидек вақтида очилади. 2-вариантда таълим онлайн давом этади. 3-вариант омихта бўлиб, мактаблар синф тизимида ишлайди ва шароитдан келиб чиқиб анъанавий ёки онлайн таълим амалда бўлади.
* * *
Халқ таълими вазири Шерзод Шерматов коронавирусга чалингани эътироф қилинган биринчи вазир бўлди. Шерматов Telegram’даги каналида бошидан кечирганларини батафсил ёзиб, ўз тавсияларини берди ва шифокорларга миннатдорлик билдирди. Дарвоқе, Сурхондарё ҳокими Тўра Боболов коронавирусдан соғайиб, ўз ишига қайтди.
Коронавирусдан даволанаётганлар сони карантин кучайтирилгунгача бўлган кўрсаткичга тушди. Бу ҳам бир ютуқ. Коронавирусдан соғайганлар 30 мингдан ошиб, даволаниш кўрсаткичи 86 фоизга етди. Бу ҳафта расман қайд қилинган кунлик юқтиришлар сони 700 нафарга етмади.
«Шарқ» гуруҳи кўринмас душман – коронавирус билан олишаётган тиббиёт ходимлари ва марҳумлар хотирасига бағишлаб қўшиқ куйлаганини кўриш учун ушбу ҳаволани босинг.
* * *
Аввалроқ Усмон Ҳақназаров тахаллуси билан йиллар давомида хориж нашрларида мақолалар ёзиб келгани учун ҳибсга олинган журналист Бобомурод Абдуллаев яна қўлга олинди. У Қирғизистонга тўрт ой аввал Марказий Осиёдаги АҚШ университетида ўқиш учун келган ва COVID-19 коронавирус пандемияси оқибатида чегаралар ёпилгани туфайли мамлакатда қолиб кетган эди.
Бобомурод Абдуллаев Бишкекда ушланди. Уни Ўзбекистон тарафи сўровига кўра қўлга олингани айтилмоқда. У Facebook’даги «Қора Мерган» саҳифасига алоқадорликда гумонланмоқда. Бироқ «Қора Мерган»нинг Telegram’даги канали июндан бошлаб ҳалигача ишлаб тургани бу гумон ҳисобига тош босмайди.
1/3 I am deeply concerned by reports that Kyrgyz authorities have detained Bobomurod Abdullayev, an Uzbekistani journalist, at the request of the Government of Uzbekistan. We are closely following his case. https://t.co/UZ5yDmChHn
— U.S. Ambassador to Uzbekistan (@UsAmbUzbekistan) August 13, 2020
АҚШнинг Ўзбекистондаги элчиси Дэниэл Розенблюм журналист Бобомурод Абдуллаевнинг Бишкекда ҳибсга олингани ҳақидаги хабарлардан хавотирдалигини билдирди.
* * *
Шавкат Мирзиёевнинг кичик куёви Отабек Умаров Триатлон федерацияси раислиги ва MMA ассоциацияси президентлигидан кетди. Отабек Умаров бу лавозимлардан кетишини вақт камлиги билан изоҳлади: «Триатлон федерацияси ҳам, MMA ассоциацияси ҳам вақт ва эътибор талаб қилади, янги шароитларда эса мен буни кафолатлай олмайман».
Хавфсизлик кенгаши котиби Виктор Маҳмудов Триатлон федерациясига раис бўлди, мудофаа вазири Баҳодир Қурбонов эса MMA ассоциациясини бошқарадиган бўлди.
Сал аввалроқ президентнинг катта куёви Ойбек Турсунов Uzcard таъсисчилари орасидан ғойиб бўлган эди. Аммо бунинг сабаби маълум эмас.
* * *
Олдинроқ олий ва ўрта махсус таълим вазири Иномжон Мажидов Ўзбекистондаги ОТМларда 2020 йилда контракт миқдори ўзгартирилмаслигини айтганди. Бироқ Telegram’даги «Талаба — ЛИВЕ» гуруҳида бирлашган 40 мингга яқин талаба пандемия шароитида бу ҳам талабаларга оғирлик қилишини айтиб енгилликлар сўрашда давом этди. Шундай қилиб, янги 2020/2021 ўқув йилида амалдаги базавий тўлов-контракт миқдори учун кундузги шаклда ўқийдиган барча талабаларга 10 фоиз чегирма бериладиган бўлди. Ушбу гуруҳ каналига «Биз ғалаба қозондик» деб ёзиб қўйилди.
* * *
16 август куни икки донгдор боксчимиз рингда ғалаба нашидасини сурди.
Шаҳрам Ғиёсов никарагуалик Уистон Кампосга қарши жанг қилди. Учинчи раунднинг сўнгги сонияларида рақибининг қорин қисмига кучли зарба бериб Шаҳрам Кампосни нокаутга учратди. Шу тариқа Шаҳрам профессионал боксдаги ўнинчи жангида ўнинчи ғалабасини қўлга киритди.
Профессионал бокснинг супер ярим ўрта вазн тоифасидаги ўзбекистонлик Исроил Мадримов ҳам шу куни америкалик Эрик Уокер билан жанг қилиб, 9-раундда рақибини нокаут ва нокдаун қилди. Ҳакамлар бир овоздан Исроилни ғолиб деб топди.
Энг сўнгги янгиликларни «Дарё»да ўқинг. Карантин қоидаларига риоя қилинг. Ҳали карантин тўла бекор қилинмаганини эсда тутинг.
Изоҳ (0)