Беларусь президентлигига номзодлар Андрей Дмитриев, Анна Канопацкая ва Сергей Черечен мамлакат Марказий сайлов комиссиясига сайлов натижалари бўйича шикоят аризаси берди. Шу тариқа президентлик сайловида Александр Лукашенкога рақобатчи бўлган тўрт номзоднинг барчаси сайлов натижаларидан норозилигини билдирди. Бу ҳақда Meduza хабар қилди.
Андрей Дмитриев ва Сергей Черечен 11 август, сешанба куни сайлов натижалари бўйича шикоят аризаларини тайёрлаётганини маълум қилган.
Сайлов натижаларидан норозилигини биринчи бўлиб мухолифот номзоди Светлана Тихановская билдирган ва 10 август куни Марказий сайлов комиссиясига шикоят киритган.
Беларусь Марказий сайлов комиссиясининг маълумотларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифот номзоди Светлана Тихановская эса 10,09 фоиз овоз олган. Қолган уч номзоднинг ҳар бири 2 фоиздан камроқ овоз тўплаган.
Овоз бериш бўйича расмий маълумотлар эълон қилинганидан кейин Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
11 август куни Тихановская Беларусдан чиқиб кетгани ва Литвада эканлиги маълум бўлди. Унинг штаби томонидан маълум қилинишича, президентликка номзод бу ишни ўз хоҳиши билан қилмаган, балки штаб раҳбари Мария Морознинг озод этилиши эвазига ҳукумат босими остида амалга оширган.
Беларусь шаҳарларида 9 августдан буён кўп минг кишилик намойишлар бўлиб ўтмоқда. Мамлакат Ички ишлар вазирлиги маълумотларига кўра, уч кун ичида милиция, тахминан, олти минг нафар намойишчини қўлга олган.
Изоҳ (0)