Эрон ҳукумати «Украина халқаро авиалиниялари» компаниясининг 2020 йил январь ойида уриб туширилган Boeing-737 самолётининг нархи миқдорида компенсация тўлашдан бош тортди. Бу ҳақда Эрон марказий суғурта ташкилотининг раиси Голамирза Сулаймоний маълум қилди, деб ёзмоқда Reuters.
«Самолёт Украинада Европа компаниялари томонидан суғурта қилинган. Ўз-ўзидан ўша компаниялар пулни тўлаб бериши лозим», — деган у.
Аввал Украина Ташқи ишлар вазирлиги вакили Эроннинг уриб туширилган лайнер учун пул тўлаши лозимлигини таъкидланганди. Украина ТИВ баёнотига кўра, Эрон компенсацияга қўшимча равишда ушбу ҳодиса учун масъул бўлганларнинг жавобгарликка тортилгани ҳақида ҳам маълумот бериши ва расмий тарзда кечирим сўраши лозим эди.
30 июлда Афғонистон, Буюк Британия, Канада, Швеция ва Украина Эрон билан мазкур самолёт ичида талафот кўрган йўловчиларнинг оилаларига компенсация тўлаш масаласини муҳокама қилганди.
Эрон ислом инқилоби муҳофизлари корпусининг «Ал-Қудс» махсус бўлинмаси генерали Қосим Сулаймоний 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган. 8 январь куни эса Эрон унга жавобан Ироқдаги Америка базасига ҳужум қилган.
Ҳужум вақти ракеталарнинг бири Украина халқаро авиакомпаниясининг Теҳрондан Киевга учаётган Boeing 737 самолётига тегиб, уни уриб туширган. Самолёт бортида 176 киши вафот этган.
Эрон дарҳол авиаҳалокатга техник носозлик сабаб бўлганини айтган. Кейинчалик, 11 январь куни Эрон мамлакат ҳаво мудофааси самолётни операторнинг хатоси туфайли уриб туширилганини тан олди ва ҳалок бўлганларнинг оила аъзоларига компенсация тўлашини маълум қилди. Январь ойи охирида Эрон ташқи ишлар вазири Муҳаммад Жавод Зариф самолётни тасодифан уриб туширган аскар қамоқда эканини айтган.
Изоҳ (0)